Air21 batok Talk ‘N Text; Meralco vs. Globalport

ANG Talk N Text, usa sa duha ka wa pa makatilaw og pildi sa nagpadayon nga PBA Philippine Cup, mosuway pagprotehir sa ilang limpyong baraha sa dihang ilang ikaatbang ang Air21 Express karong gabii ug sa unang higayon ning nagpadayon nga season, anha na sa Mall of Asia Arena sa Pasay City.

Ang Tropang Texters (2-0) ug ang Express (1-2) mag-abot sa alas 7:30 sa main game karong gabii diin si coach Norman Black mao nay modala sa kinatibuk-ang duwa sa Texters human niya mahatod ang Ateneo Blue Eagles sa ikalimang sunodsunod nga titulo sa UAAP.

Tukma ang panagsangka sa duha sanglit ang kanhi La Salle coach nga si Franz Pumaren mao man usab ang modala sa Air 21.

Niadtong Biyernes, si Black di gyud unta mo-coach sa Talk ‘N Text batok sa newcomer Globalport, diin ang iyang asst. coach nga si Nash Racela maoy padad-on.

Pero napugos si Black nga mo-coach sa Texters sa dihang miarangkada ang Batang Pier ug miposte kini og 16 puntos nga labaw sa second half.

Hinuon ilang nabuntog ang Globalport, 108-104. Ila usab nga gipatapsingan ang Meralco Bolts niaedtong Oktobre 5, 112-110.

Ang Meralco ug Globalport magsangka usab karong hapon nga sugdan sa alas 5:15 sa preliminary match.

Ang Bolts anaa pa sa ilang kainit human makarehistro og duha ka sunodsunod nga kadaugan sunod sa ilang unang kapildihan batok sa Texters samtang ang Batang Pier wa pay gidag-an sa tulo ka duwa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph