Albor: Laray sa mga palusot

GIKOTOY ang tiyan sa mga Pilipino samtang minilyon ka pesos ang nahabwa sa panudlanan sa gobyerno gumikan sa pangurakot. Ang nahib-as nga salapi dako unta og ikatabang sa mga senior citizens, vendors, mag-uuma, mananagat, mamumuo, kabataan, magtutudlo, squatters ug ubang sektor nga nanginahanglan. Ang tunob sa mga anomaliya ni kanhi Pres. Gloria Arroyo napatik sa akong lindog sa Mayo 18. Karon ang laray sa mga palusot ubos sa pamunuan nila ni kanhi Pres. Ferdinand Marcos ug Fidel Ramos.

* * *

Highway Anomaly: Sa panahon ni Marcos nalambigit sa P86M public highways scandal ang kontraktor ug supplier nga sila si Antolin Jariol Jr., Rufino Nuñez ug Erasmo Gabisan lakip na sa 15 ka mga kawani sa DPWH 7 sa 1976. Si Jariol nga kanhi barangay captain sa Guadalupe ug ABC president gisentensyahan og 276 ka tuig sa pagkabilanggo. Nasikop Mayo 27, 2000 sa ilang panimalay sa Guadalupe human sa duha ka dekada nga pagtago-tago sa US. Maoy nagsignit kaniya ang mga sakop sa Presidential Anti-Organized Crime Task Force (PAOTCTF) pinasikad sa warrant of arrest nga gipakanaug ni Sandiganbayan Presiding Justice Francis Garchitorena sa 1996 ubos sa 23 counts of estafa.

Falsification of public and commercial documents pagpanikas sa daghang mga proyekto nga walay nakitang proyekto (ghost projects). Si Jariol napiling kapitan sa 1981 hangtod sa panahon nga nakonbikto.

* * *

Coco Levy: Ang coco levy fund scam maoy kontro­bersiya sa 1970’s ug 1980’s. Nalambigit niini si Pres. Marcos ug mga chronies nga sila si Danding Cojuangco, Juan Ponce Enrile ug uban pa. Gipahamtangan og dagkong buhis ang mga mag-uuma sa lubi ubos sa saad nga palamboon ang coconut industry ug hatagan og bahin isip share of investment. Apan gigamit diay ni Marcos ug kaubanan sa ilang personal nga panapi pinaagi sa pagpalit sa United Coconut Planters Bank (UCPB) ug sa dakong pahat sa San Miguel Corp. (SMC).

* * *

Amari Land Deal: Naglambigit nila ni kanhi Pres. Fidel Ramos ug House Speaker Jose de Venecia nga gibunyagan og grandmother sa tanang anomaliya. Niadtong Abril 28, 1995 ang konbiktadong gold smuggler nga si George Triviño nakadawat og 31 ka mga tseke nga mokabat og P300M gikan sa Amari Coastal Bay Resources Corp. Usa ka Thai-Filipino Company nga mopalit sa gi-reclaim nga propiyedad sa Manila-Cavite Coastal Road. Ang maong salapi gideposito sa Traders Royal Bank sa UN Avenue branch. Apan giingong gi-withdraw sa sister-in-law ni Speaker de Venecia sa wala pa ang lokal nga eleksyon.

Niining “daang matuwid” ni Pres. Noynoy Aquino wala na ba kahay hilom nga palusot.

Daghan ra bang misamot kadato apan wala mabaswat ang kahimtang sa mga kabos.

Related Stories

No stories found.
SunStar Publishing Inc.
www.sunstar.com.ph