Albor: Vendors Boogie

KAAKOHAN sa market authority ang pagsusi kon wala na bay vendors nga mibaligya sa ilang puwesto sa merkado. Dunay nahirada kay nahinayak og pangutang sa turko nga kusog kaayong maningil sa tanto. Mga merkado sa siyudad naglakip sa Pardo, Inayawan, Pasil, Duljo-Fatima, Tisa, Labangon, Taboan, Banawa, Ramos, Citi Center, Mabolo, T. Padilla ug Carbon. Hingpit nang natukod ang Unit 2 Carbon Market nga P170M hulip sa nasunog sa 1998. Gagmayng mer­kado sa Gorordo, Salinas Drive, Tabada-Mambaling, Barrio Luz ug Punta Princesa. Dunay mga satellite markets.

Vendors boogie nga walay pwesto sa merkado midagsang sama sa sidewalk, roadside ug ambulant vendors. Dugangan pa sa nagligdas nga mga anak sa liki sa kawayan, makililimos, latagaw nga manag-uyab ug mugbog lupad. Asa diay ang DSWD, Streetchildren Foundation, City Health ug ang balaod sa anti-vending, anti-loitering, anti-mendicancy ug vagrancy?

* * *

Pinangita ang mga pagkaong makalagsik, makapagana ug makapagatas. Mao diayng halinon ang mga kinhason. Kasagaran gikan sa Negros ang tahong. Sa Leyte ang punaw ug barinday. Gikan sa Calitoban, Masingin, Gindakpan, Cabul-an sa Bohol ug isla sa Bantayan sa Cebu ang takubo, bungkawil, saang, tuway, imbaw, aninikad, tambayang, bug-atan, litob, binga, lasik, suso, balisaa, talaba, halaan ug lukot. Sa Hingutanan ug Talibon, Bohol kasagaran maggikan ang guso. Itumod sa Pasil, komprahon sa mga vendors ug ibaligya sa mga merkado sa siyudad, metro ug lalawigan sa Sugbo.

* * *

Gipaguba kadtong karaang merkado sa Ramos sa 1988. Nagtukod og bag-o si Mayor Alvin Garcia ug gitibawas ni Mayor Tomas Osmeña sa 2004.

Atubangan mao ang nanindag prutas nga namalhin gikan sa Chong Hua nga nawagtangan og puwesto sa dihang gitukod ang Robinsons Cybergate. Kabahin sa mga fruit stand nga limpyo ug hapnig. Samtang ang merkado sa Labangon kaniadto katubhan nga gipanag-iya ni Jacinto Pacaña nga Katipunan St. na karon kay didto giplano sa mga rebolusyonaryong katipunero ang panagsangka batok sa mga Katsila. Mibadhas ang kombati sa luna ni Valeriano Weyler. Ang Weyler St. giilisan og Tres de Abril St. pahinungod sa kadaugan pinangulohan ni Pantaleon “Leon Kilat” Villegas sa Abril 3, 1898. Sa kaabusado sa mga Katsila dunay Spanish Convento duol sa dakong balay nga giaptan og tisa gidauban sa mga rebolusyonaryo nga maoy nahimutangan karon sa merkado sa Tisa. Midulhog ang mga rebolusyonaryo sa Duljo nga nahimutangan karon sa merkado aron pag-atake sa presensya sa mga Katsila. Gihimong Duljo-Fatima kay dunay kapilya sa milagrosong Lady of Fatima dapit sa Ma Gochan Subdivision.

* * *

Nabalaka ang mga tinderag pagkaon ug inasal sa Mambaling nga mokunop ang ilang negosyo kon mahuman ang mall sa jai alai site sa dalan C. Padilla, Alaska. Kabahin sa kasaysayan ang gibungkag nga Spanish design nga edipisyo nga natukod sa 1970 nga maoy duwaanan sa mga pelotari nga gisakyan sa sugal nga masiao. Giabandonar sa 1990 ug gihimong tugpahanan sa daklit nga lambada sa kalipay.

(csa_1156@yahoo.com/0905-250-4643)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph