GIKLARO ni kanhi mayor ug Kugi Uswag Sugbo (Kusug) mayoral candidate Alvin Garcia nga dugay na siyang nipahibawo sa iyang pagsuporta kang Nacionalista Party (NP) presidential bet Manny Villar.
Labaw nang wa mag-away ang ilang pamilya tungod lang sa pulitika.
Mao kini ang reaksyon ni Garcia sa sayong pamahayag ni Mayor Tomas Osmeña nga di na siya masurpresa nga managlahi og mga kandidato sa pagka presidente ang mga Garcia.
Si Osmeña nagmugna human pormal nga nakig-alayon ang Kugi Uswag Sugbo (Kusug) sa Nationalista Party ni Manny Villar.
Matod ni Osmena nga gituyo kini sa mga Garcia aron makuha ang funding sa tanang mga partido.
“Si Tomas Osmena masakiton man gihapon karon. Ang iyang mga pamahayag karon dili na rational, may pagka-erratic na gamay,” dugang ni ni Garcia.
Siya niingon nga hinapos sa milabayng tuig ug nilabay nga mga buwan, daan na siyang nipahibawo sa publiko nga siya posibling makig-alayon kang Villar.
Samtang ang iyang ig-agaw nga si Gob. Gwen Garcia daan na usab nga nipahibawo nga adto mopaluyo kang Lakas-Kampi-CMD presidential bet Gilberto “Gibo” Teodoro.
Matod ni Alvin nga nabatasan na nila nga mga Garcia nga morespito sa tagsa-tagsa ka mga baruganan ug di mag-kontrahay tungod lang sa politika, di sama sa mga Osmena.
Matod sa kanhi mayor nga silang mga Garcia magtinabangay sa politika kabahin sa local nga eleksyon, apan may mga higayon nga magkasumpaki sila sa nasyonal.
“ Si Tomas nahibawo na siya nga sa 2004 FPJ ko. Unya sila si Gwen that time tua sila ni GMA. This is not the first time nga nagkabuwag mi og kandidato sa nasyonal,” matod ni Alvin. (JFT)