Amahan giluba sa anak, grabe sulod sa ospital

MAGSAYSAY, Davao del Sur -- Talandugon ang kahimtang sa usa ka amahan human giunay og luba sa kaugalingong anak samtang nangahubog didto sa Barangay Bacungan.

Gidali sa pagdala sa balay tambalanan si Renato Perocillo, 44, mag-uuma, sa dihang gidunggab alas 3:00 sa hapon niadtong Dominggo.

Kini maoy inisyal nga resulta sa gihimong imbestigasyon ni Chief Inspector Robert Caraoa, hepe sa Magsaysay Police Station.

Samtang ang anak nga maoy nagdunggab sa amahan nailhan nga si Gabriel, 21, ulitawo.

Nasayran nga lango sa makahubog nga ilimnon si Gabriel sa dihang nakalalis ang amahan ug giluba.

Sumala pa nga wa makapugong ang anak sa kasuko hinungdan nga milanit og kutsilyo ug gihansakan ang amahan.

Hinuon, si Gabriel nadakpan sa mga opisyal sa barangay sa pagpanguna ni Kagawad Maximo Amaba Jr., kinsa maoy nay mitunol kaniya ngadto sa kapulisan.

Gawas sa kutsilyo nga nakuha sa kapulisan gikan sa suspek, nasakmit sab gikan kaniya ang nilikit nga layang dahon sa marijuana sa dihang girekisa sa kapulisan.

Duha ka mga kaso ang atubangon karon sa suspek nga mao ang frustrated parricide ug ang kalapasan sa Republic Act 9165 o ang Comprehensive Dangerous Drugs Act of 2002. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph