NAGPABILING Hari ug Reyna sila Sonny Wagdos ug Mona Liza Ambasa sa lalaki ug babaye sa 10k sa Phoenix Family Fun Run nga nagsugod ug nahuman didto sa SM Lanang Premier isip kabahin sa pagselebrar sa 77th Araw ng Dabaw kagahapong adlawa.
Mitala og oras si Wagdos og 33 minutos ug 24 segundos aron mapildi sila Elmer Bartolo ug Michael Echalico nga mioras og 34:34 minutos ug 34:41 minutos alang sa ikaduha ug ikatulong puwesto sa maong han-ay.
Samtang sa babaye, nahuman ni Ambasa ang lumba og 42:59 minutos batok ni Cynthia Jaro (44:36) nga nabutang sa ikaduha ug ikatulo si April Diaz (46:10).
Luyo sa pagkadaug ni Wagdos, gibutyag niini nga wa siya makuntento tungod wa niya nabuak ang iyang rekord niadtong milabay nga tuig sa maong torneyo nga 32 minutos.
"Happy ko pero kulang gihapon kay ang time nako ang giapas, wala nako na-break ang rekord last year," ni Sonny atol sa pakighinabi kaniya.
Dugang pa niya nga ang iyang pag-apil sa Phoenix kini kabahin sa iyang pagpangandam sa umaabot Private School Athletic Association (PRISAA) National karong Abril ug Philippine National Games (PNG) sa Mayo.
Samtang malipayon sab si Ambasa kinsang kampeyon sab niadtong Phoenix Marathon 2012 nga siya ang nanguna sa babaye karon batok sa mga banggiitang batang kalaban.
"Lipay kaayo ko kay ako ang midaug kay di sab basta-basta akong mga kalaban," batbat ni Mona Liza kinsang modepensa sab og titulo sa sunod semana sa Run for Peace didto sa Tagum.
Sa 5k, ang tulo nga nanguna mao sila Michael Constatino (16:55), Rolly Paderna (17:08) ug Glen Payac (17:12) samtang sa babaye sila Maygae Ne¤ora (19:48), Ruffa Sorongon (20:11) ug Creselyn Jaro (20:22).
Sa 3k, sila Jetli Lirazan (10:20), Jilian Naparan (10:23) ug Josalman Bajao (12:21) ug sa babaye sila Pia Suarez (12:08) Vernagil Sabuero (12:28) ug Natalie Margarette Roble (13:55).
Gipasidunggan sab ang pinakabatang midagan nga si Joan Francis Palacio sa edad 2 anyos nga miapil sa kategoryang 5k samtang ang Biggest school delegation mao ang Hizon Elementary School ug ang daghang miapil sa Local Government Unit (LGU) mao ang Province of Compostela Valley nga giulohan ni Gov. Arturo Uy nga midagan sab sa kalihukan.
Ang Team Titans of Davao ang nakadawat sab sa award nga pinakadaghan “Running Groups.”
Ang tulo nga nanguna sa matag kategorya nakadawat og premyong kuwarta ug medalya sa lalaki ug babaye dibisyon samtang sa mga nakadawat og special awards gihatagan og gift certicates.