Ang freedom of expression dili krimen!

KALAMPUSAN sa mga mibatok sa Cybercrime Prevention Law o Republic Act 10175 ang pagpakanaug sa Korte Suprema og Temporary Restraining Order sulod sa 120 ka adlaw. Gitakda ang pagtuki sa petisyon karong Enero.

Taliwala sa temporaryong kalampusan, angayan nga ipadayon ang pakisayod labot sa balaod nga matud pa hinay-hinay nga mopatay sa kagawasan sa pagpahayag.

Dihang nag-eskuwela pa ko sa kolehiyo, nakasentro ang among mga leksiyon sa tri-media nga mao ang telebisyon, radyo ug mantalaan. Gitun-an usab ang pagsulat nga balanse ug sakto.

Apan kaniadto, dili pa popular ang gitawag karon nga "new media" o ang internet. Karon, mas milapad ang responsibilidad sa mga media nga mohatud og balita ug impormasyon sanglit ang mga naandan nga radyo, telebisyon ug mantalaan, duna nay "ekstensiyon" sa Internet.

Sa Internet usab mas dunay mga lawom nga pagtuki sa mga isyu, mas taas nga pagpresenta sa mga balita sanglit walay limitasyon ang internet pag-abot sa espasyo ug oras. Mas dali usab kining magamit o accessible kini sa kadaghanan. Mas daghan usab og tsansa nga makaani og mga reaksiyon o opinyon sa katawhan.

Nasayud kita nga sa Internet, dili lang media practitioners ang mamahimong mohatud og balita ug impormasyon ingon man mopadayag og opinyon, tungod kutob dunay internet connection, mamahimo ka nang makagamit niini.

Sa ka-high-tech sa mga cellphone karon ug daghan na usab ang nagtanyag og libreng wifi connection, dali na lang gayud makagamit sa Internet.

Busa karon nga henerasyon, gikonsidera na kining "most powerful medium". Ug sama sa ubang medium, ang gahum niini dunay limitasyon ug dunay dakong responsibilidad.

Angayang tan-awon sa kagamhanan nga ang Internet usa ka epektibong pamaagi aron ang katawhan dali nga mopadayag sa mulo, suhestiyon ug opinyon labot sa pagpadagan ug sa mga nagpadagan sa panggamhanan. Kini ang mas angayang tutukan sa magbabalaud o sa gobyerno sa kinatibuk-an: ang pagduso sa mas responsable nga paggamit sa internet nga mao na usab ang giduso sa mga pribadong kompaniya ilabi na media organization. Kini mao ang tinuod nga esensiya sa kagawasan! Tudloan sa responsable nga paggamit sa internet. Dili ang kaso nga libel nga usa ka lakang aron patyon ang kagawasan sa pagpahayag!

Alang sa mga mibatok sa Cybercrime law, angayan gayud tutukan ang mga krimen nga nahitabo online, sama sa pagpangilad gamit ang internet, child pornography ug uban pa. Apan dili makatarunganon nga ilinya sa maong mga krimen ang "freedom of expression".

Dili nato kalimtan ang Article 3, Section 4 sa Konstitusyon: WALAY BALAOD NGA IPASA NGA MOPUGDOL SA KAGAWASAN SA PAGPAHAYAG.

Ang pagbatok sa sayop nga probisyon sa Cybercrime law, dili lang ni kombati sa mga sakop sa media apan angayan kining pakigbisugan sa mga mibarog nga panalipdan ang demokrasya. Bisan unsang panahon (eleksiyon man o dili) mahinungdanon nga kita makisayod o kaha mosalmot sa diskusyon sa radyo, telebisyon, mantalaan o internet. Tungod mas mahinungdanon sa demokrasya ang lungsoranon nga nasayud ug nagpakabana.

Simple truth.

Daghang salamat sa Sun.Star Superbalita sa paghatag ug higayon ug sa espasyo aron mapalapdan pa ang paghatud og dugang kasayuran labot sa nag-unang isyu. Dungan kitang mobarug alang sa kamatuoran, mamahimo ka nga mopadayag sa imong suhestiyon ug opinyon, i-email lang sa: simpletruth.sunstar@yahoo.com (Derf Maiz)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph