Babaye giluba sa kapuyo, patay

DEAD on arrival sa balay tambalanan ang usa ka babaye human giluba mismo sa kapuyo niini niadtong Sabado mga alas 8:05 sa gabii sa lungsod sa Sugbongcogon, Misamis Oriental.

Ang biktima giila lamang sa ngalan nga Ging-ging, 54, ug gitumbok nga suspetsado mao si Leopaldo Cajuslos, 67.

Basi sa asoy sa anak niini sa mga biktima nga bisan tuod dili kasado ang iyang mga ginikanan apan iyang nabati nga naghinigugmaay ang duha ug daw masuko lang ang inahan panahon na mahubog kini si Leopaldo.

Sa wala pa nahitabo ang insidente nakig-inom sa iyang mga silingan si Leoplado ug lango na sa ilimnong makahubog nga miuli sa ilang puloy-anan.

Tungod niini gisita ni Ging-ging ang iyang kapuyo nga miresulta sa panaglalis. Nasuko si Leoplado ug kalit lang mikuha og kutsilyo sa kusina.

Gibalikan si Ging-ging ug giluba ang dughan sa biktima ug human niini giluba usab sa suspek ang iyang kaugalingon hinungdan pulos samaran ang duha.

Daling gipangdala ang biktima sa Northern Mindanao Medical Center (NMMC) ning siyudad sa Cagayan de Oro apan dead on arrival sa NMMC si Ging-ging.

Si Leopaldo padayon pa nga giobserbahan sa mga doctor sulod sa emergency room ning panahona. Ang kaso usab giimbestigahan na sa Sugbongcogon Police Station.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph