Bagyong Ruby mihinay og gamay

NIHINAY ang gikusgon sa hangin sa bagyong Ruby ug niusos usab ang dayametro niini apan nagkahinay ang pag-irog niini samtang nagkaduol sa Eastern Visayas, gumikan sa hanging amihan.

Matod sa Philippine Atmospheric, Geophysical and Astronomical Services Administration ug Joint Typhoon Warning Center, dili na mahulagway nga supertyphoon ang bagyong Ruby nga gibanabana nga moigo sa yuta sa Eastern Samar-Northern Samar karong gabii o ugma sa buntag.

Alas 4 kagahapon sa hapon, ang gikusgon sa ha­ngin sa bagyo nikanaug sa 195 ka kilometros matag oras haduol sa iyang sentro gikan sa 215 ka kilometros matag takna, samtang ang pag-unos niusos sa 230 kph gikan sa 240 kph.

Gihulagway nga usa ka “divine intervention” ang nahitabo human nisulod ang bugnaw nga hangin gikan sa Siberia ug nakaapekto sa bagyong Ruby hinungdan sa paghinay niini.

Nagkahinay usab ang pag-irog sa bagyo gikan sa 15 kph ngadto na sa 13 kph sa direksiyon nga kasadpan-amihanang-kasadpan.

Ang maong kausaban ang gikabalak-an tungod kay kon mohinay, dugay kini nga makaapekto sa Visayas area.

Ang Pagasa nipasidaan nga di angay mokompiyansa ang publiko bisan nihinay ang gikusgon sa hangin sa bagyong Ruby tungod kay kasarangan ngadto sa kusog nga uwan o 7.5-20 millimeters ang dala niini sud sa 600 kilometers diameter labi na sa eastern sections sa Southern Luzon ug Visayas.

Ang Pagasa nipahimangno sab sa posible nga storm surge sa silangan nga bahin sa Samar, Bicol ug mga probinsya sa Surigao.

Alas 4 kagahapon sa hapon, ang bagyong Ruby gibanabana nga anaa nahimutang 380 kilometros silangan sa Borongan, Eastern Samar.

Sa pagkutlo ning balita, nagpabilin sa signal number 2 ang northern Cebu, apil na ang Bantayan Island ug Camotes Island, Cebu City, Leyte, Southern Leyte, Eastern Samar, Samar, Northern Samar ug Biliran, Sorsogon, Ticao Island ug Masbate.

Samtang, anaa sa signal number 1 ang mga probinsya sa Catanduanes, Albay, Camarines Norte, Camarines Sur, Burias Island ug Romblon sa Luzon; Capiz, Iloilo, Antique, Aklan, Negros Oriental, Negros Occidental, ubang bahin sa Sugbo, Siquijor ug Bohol sa Visayas; ug Surigao del Sur, Agusan del Norte, Surigao del Norte, Dinagat Island, Siargao Island, Misamis Oriental, Agusan del Sur ug Camiguin Island sa Mindanao.

Bakwit

Si Cebu City Mayor Michael Rama nimando usab sa mga lumolupyo sa pagpamakwit.

Mga barangay nga iyang gimandoan naglakip sa Ermita, Pasil,Suba, Mambaling, Sawang Calero, Cogon Paro ingon man Laguerta sa Lahug nga kuyaw sa landslide.

Ang Cebu City Government nihimo sa Regino Mercado Memorial National High School, Gothong National High School, Cebu City Sports Institute, San Nicolas Elem. School, Mambaling gym, Basak Community School, Zacate Gym, Pardo Elem. School, Inayawan Elem.

School, San Roque gym, CTU, Tejero Elem. School, Mabolo Elem. School isip evacuation center nga adunay tag duha ka mga dagkong bus nga gidestino aron maoy mohakot sa mga lumolupyo.

Sa dakbayan sa Mandaue, ilang prayoridad sa evacuation mao ang mga senior citizen, persons with disabilities (PWD), ug mga mabdos.

Matod ni disaster management officer Felix Suico nga dunay mga lawak nga gitagana alang sa mao nga mga tawo.

Gibuksan usab sa dakbayan sa Talisay ang ilang city hall alang sa mga tawo nga mamakwit.

Mga lumolupyo sa Brgy. Manipis gipahakot ni Brgy. Kapitan Emma Cabiluna kay kuyaw sa landslide.

Ang mga lokal nga kagamhanan sa amihanang Sugbo padayon nga nakaalerto sa posibleng baha, landslide ug storm surge nga mamugna sa bagyo.

Si Mayor Valdemar Chiong niawhag na usab sa mga lumolupyo sa kabaybayunan nga mamakwit kon modagko ang mga bawod sa mga evacuation center.

Sa lungsod sa Santa Fe, isla sa Bantayan, kapin sa 4,000 ka mga indibidwal ang gihiklin sa mas luwas nga mga lugar sama sa mga tunghaan.

Samtang, 9,212 ka mga indibidwal ang gipabakwit usab sa lungsod sa Bantayan nga kasagaran gipahiluna sa mga publikong eskwelahan.

Si Marlon Pacaña, executive assistant ni Bantayan Mayor Christopher Ian Escario, nipahibawo nga laing 312 ka mga pamilya sa barangay Sungko ang gipabakwit usab.

Ang Provincial Disaster Risk Reduction and Ma­nagement Office nakig-alayon na sa National Telecommunications Commission ug Federation of Volunteers through Radio Communications, Inc. alang sa klaro ug hapsay nga dagan sa komunikasyon labi na sa mga lugar nga posible maapektuhan sa bagyo.

Si Maritoni Corominas, chairperson sa FVRC, Inc., nipahibawo nga naka-standby na ang mga ekipo sa ilang mga sakop sama sa very high frequency, ultra high frequency ug high frequency radios nga maoy dali nga magamit kon maapektuhan ang signal sa mga

telecommunication company.

Moabot sa 600 ka radio communicators volunteers sa Sugbo ang makig-alayon sa probinsya alang sa paspas nga pag-report, paglabay og kasayoran ug pagrespondi atol ug human sa bagyo. (Dugang taho sa Sunnex)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph