MAG-UUMA nga wala madala sa paghaylo nga mobalhin sa laing “relihiyon” midangop sa kapulisan kay gisunog ang iyang payag sa silingang nag-recruit kaniya nga naglagot niadtong Sabado sa alas 4:00 sa hapon sa Barangay Pugalo, lungsod sa Alcoy.
Si Eduardo Cabahig, 68, dunay kapuyo, mag-uuma ug molupyo sa maong dapit, nidangop sa kapulisan sa Alcoy niadtong Sabado sa hapon ug gusto nga ipadakop niya ang iyang silingang si Saturnino Jimenez, 62, laborer ug dunay kapuyo sa samang dapit.
Si PO3 Emelio Carungay, imbestigador sa Alcoy police, nagkanayon nga ang duha dunay panagbangi sa miaging bulan bahin sa pag-agni sa suspek sa biktima nga mobalhin sa ilang relihiyon (ngalan sa relihiyon gipungan sa Sun.Star Superbalita).
Nagkadako ang lalis human ang biktima nanaad nga magpakamatay sa iyang natawhan nga relihiyon nga Romano Katoliko, diin gisaway pag-ayo sa suspek.
Nagtagbo og balik ang ilang dalan nianang alas 12:00 sa udto niadtong Sabado, nagtagay ug uban sa igsuon sa asawa sa biktima hangtud nga nangahubog ug nahisgutan og balik ang relihiyon.
Wala gihapon nakombinser ang biktima hinungdan nga niuli nga naglagot ang suspek nga hubog na usab kaayo nga nisangko sa pagdaub sa payag sa biktima.
Walay nahimo ang biktima ug naugdaw sa hingpit ang payag, lakip ang ilang kabtangan diin tanan mibalor ngadto sa P40 mil.
Usa ka 12-anyos nga bata ang nakasaksi sa pagdaub sa payag hinungdan nga gidakop ang suspek sa kapulisan.
“Ipangkiha tamo tanan og illegal arrest, ingon man illegal detention kay wala koy sala unya inyoha kong dakpon nga walay basehan aroganting pamahayag ni Jimenez,” sumala pa ni PO3 Carungay. (GPL)