USA ka matang sa balyena o whale ang mibutho sa lapyahan sa dagat alas 9:10 sa buntag didto sa Seawall, Barangay 76-A Bucana ning siyudad sa Davao.
Sayo pa lamang sa buntag nakurat ang mangingisda nga si Guiller Corpin kinsa maoy unang nakakita sa maong matang nga mananap sa dagat.
Nakita sa mananagat ang dul-an napulo ka silik sa maong mananap nga miibabaw sa lapyahan sa baybayon.
Taud-taod miabot ang mga personahe sa D' Bone Collector nga anaa Makita sa maong barangay ug ilang gipanid-an ang lihok sa maong mananap sa baybayon.
Mihimo dayon sila og inspeksyon sa daplin sa baybay diin ilang na-rescue ang usa ka 12-feet nga Blainville's beaked whale nga nagluya na.
Si Baranagay 76-A Kapitan Rolando Trajera nag-asoy nga sagad sila makakita og maong matang sa isda duol sa ilang baybayon nga maoy nakalingaw kanila.
"Di lamang ni karon nakita sa mga molupyo. Daghan na nga higayon, malingaw gyud ang mga residente pag makita ni nila nga mo-ambak-ambak diha sa lawod, pero di man nila hilabtan," sulti ni Trajera sa pakighinabi sa Superbalita pinaagi sa telepono kagahapon.
Sumala sa mga eksperto nga sagad mopakita ang maong matang sa isda sa daplin kung makasinati sila og init nga panahon sa lawod.
Ang dolphin usa ka banay sa Blainville's beaked whale kun (mesoplodon densirostris) nga sagad makita sa kadagatan sa nasud Japan, Hawaii apan usahay mapadpad sab sa kadagatan sa Pilipinas.
