Bana gipusposan sa asawa, patay

PATAY ang usa ka bana human gipusposan og botelya sa kaugalingong asawa didto sa Sityo Lower Maubog, Barangay Tibagon, lungsod sa Pantukan, Comval Province, Sabado sa gabii.

Nailhan ang biktima nga mao si Predencio Austria, hamtung ang panuigon, molupyo sa maong dapit. Samtang ang gitudlo nga suspek mao si Trinidad Austria, hamtung ang panuigon.

Nasayran gikan sa Comval Province Police Provincial Office nga pasado alas 10:00 gabii, gipapauli ni Predencio si Trinidad kinsa nag-inom ug lango na niadtong tungura sa makahubog nga ilimnon.

Apan inay nga mopatuo, nasuko hinuon ang asawa ug iyang gipuspusan og botelya ang ulo sa iyang bana.

Naundang lang ang asawa sa pagpuspos og botelya ngadto sa biktima sa dihang naglisud na kini og ginhawa.

Natumba ang biktima ug nakuyapan hinungdan nga dali siyang gidala sa mga nakasaksi sa pinakaduol nga opsital.

Apan wa na kalahutay ang biktima ug nakabsan sa iyang kinabuhi pag-abot sa ospital human nakahiagum og grabing mga bun-og ug samad sa ulo.

Samtang ang suspek abtik sab nga misibat padulong sa wa matino nga lugar human sa hitabo.

Kapulisan sa lungsod sa Pantukan milutos na sa suspek nga asawa aron nga madakpan ug manubag sa salaod nga nahimo. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph