Bana nasuko nga gibalibaran og sex

NASUKO ang bana nga wa gipa-sex sa iyang mabdos nga asawa hinungdan nga gihulga niyang sunogon ug patyon niadtong miaging buwan sa dakbayan sa Sugbo.

Niini, ang Cebu City Prosecutor’s Office nirekomendar sa pagpasaka og kasong kalapasan sa Anti-Violence against Women and their Children batok sa 28 anyos nga suspek sa korte.

Mamahimong makapiyansa ang suspek sa kantidad nga P60,000 alang sa iyang temporaryong kagawasan.

Nisaysay si Joana (tinuod nga ngalan gipugngan), kinsa may tulo sila ka anak sa

suspek, nga samtang naghigda siya sa katre usa ka higayon sa miaging buwan, niabot ang iyang bana.

Giingong nihangyo kaniya ang suspek nga makig-sex kaniya apan iyang gibalibaran kay mabdos.

Apan wa kini manumbaling, nasuko na hinuon kini ug gihulga siya ug ang ilang mga anak.

u201cSunogon ta mo ug patyon kay andam kong mamatay ug mopatay,” pagkutlo sa asawa sa hulga sa iyang bana nga nag-alintabo ang kasuko nga wa mapahungaw sa nag-uros niyang gibati.

Nibarog siya sa katre apan giduot siya sa suspek aron di makabangon.

Apan bisan pa sa pagpugong sa iyang bana, nanglimbasog siyang makaeskapo ug nakalighot gyud.

Dali siyang nigawas sa ilang balay ug nakaabot siya sa Barangay Hall sa ilang dapit diin gireklamo niya ang insidente.

Niini, gikuyogan siya sa mga barangay tanod sa ilang dapit ug giadto nila ang iyang bana sa ilang balay.

Gipahibawo sa mga tanod ang iyang bana nga may reklamo batok kaniya.

Dihang ilang giduol sa mga tanod, nagtakin hinuon kini og kutsilyo sa iyang hawak.

Gidala gyod siya sa mga tanod sa buhatan sa kapulisan ug dihang gipangutana siya sa reklamo sa iyang asawa, nihimakak kini.

Bisan niini, gisikop siya pinaagi sa citizen’s arrest ug gipasakahan siya og kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph