NAGBANGUTAN sa kasub-anan ang usa ka pamilya human upat ka mga bata ug usa ka edaran ang namatay kinsa nangalumos sa pagkalunod sa bangkang de motor nga ilang gisakyan.
Ang insidente natigayon alas 4:10 sa hapon, Biyernes, didto sa kadagatan sa Seagull-lid, Punta Dumalag, Barangay Matina Aplaya, Talomo District.
Ang mga namatay mao sila Justine Intod, 3; Moreen Intod, 4; Carl Vincent Intod, 6, pulos magsuon; Bambi Oros, 3, ug ang ilang apuhan Antonio Chavez, 63, pulos residente sa Muslim Village, NHA Bangkal, Talomo District.
Sumala sa iyaan sa mga biktima nga si Jane Amado, 26, residente sa NHA Bangkal, nga usa iyang anak nga si Nasper, 11 sa upat nga naluwas gikan sa siyam nga sakay sa bangkang de motor.
Subay sa impormasyon nga nakalap sa Sun.Star Superbalita nasayran nga gikan nangaligo sa Seagull-lid ang mga biktima diin pauli na sila sakay sa bangka ug aksidente kining nawad-an sa balanse.
Giingon nga daghan ang milingkod sa dulong sa bangka hinungdan nga natuwad kini ug nasudlan og tubig-dagat.
Nangayo pa og panabang ang mga biktima apan giingong wala nay nakadungog kanila kay layo na sila sa kabalayan sa dapit.
Ulahi nang naabot ang kapulisan ug ang medical team sa Central 911 diin ang mga biktima anaa na sa mala ug ang upat nga naluwas sa usa ka mananagat nga miagi sa nalunoran sa bangka.
Ang lima gideklarang patay na una miabot ang medical team ug gipangdala sa usa ka punerarya sa siyudad.
Dugang nasayran nga posibleng si Chavez hubog sa alak una nahitabo ang aksidente.
Mga naluwas mao sila Ryza Jane Amado, 7; Riza Joy Oros, 10; Kiesha Mata, ug Nasper Mata kinsa anaa na sa luwas nga kahimtang apan gibantayan sud sa ospital sa Southern Philippines Medical Center (SPMC) sa ilang gibati nga trauma. (Jeepy P. Compio/Bombo Radyo Davao)