CAMP DARAPANAN, Sultan Kudarat - Gikumpirma mismo ni Bangsamoro Transition Commission (BTC) head ug MILF chief negotiator Mohagher Iqbal nga dili kompleto ang draft sa Bangsamoro Basic Law nga ilang gisumite ngadto kang Pangulong Benigno Aquino III labot mugnaon nga bag-ong political entity sa Mindanao.
Matud ni Iqbal nga apil sa wala nila maapil ang mga importante nga dokumento nga rekomendasyon sa Independent Commission on Policing sa himuon nga police force sa Bangsamoro region ug dokumenton alang sa automatic block grants, special development fund ug Bangsamoro waters.
Apan giklaro sa opisyal nga ila dayon kining isunod aron ma-istudyuhan sa Presidente alang sa usa ka urgent bill nga hisgutan sa kongreso.
Kahinumdoman nga napakyas ang komisyon nga hisgutan ang draft sa Bangsamoro Basic Law niadtong Marso 31.
Gidugang ni Iqbal nga miagi sa makuting proseso ang paghimay-himay sa maong balaod.
Ang Bangsamoro basic law maoy mohulip sa Republic Act 9054 nga maoy mimugna sa Autonomous Region in Muslim Mindanao. (Edgar Fuerzas)