Bañoc: Beato Calungsod

GIBIYAHE na kagaha­pon paingon sa Roma ang opisyal nga imahen ni Beato Pedro Calungsod nga nanukad sa Cebu Metropolitan Cathedral. Daghan sa iyang mga debotos sa Sugbo ang midugok sa pagsaksi sa iyang imahen kinsa puno sa kalipay sa pagkahimo na niyang Santos karong Oktubre 21.

Human sa iyang kanonisasyon sa Vatican, si Calungsod mao ang ikaduhang Pilipino nga santos. Nag-una kaniya si San Lorenzo Ruiz sa Manila kinsa gideklarar ni Papa Juan Paulo II nga santo niadtong Oktobre 18, 1987.

Apan mas dasig kitang mga Bisaya sa gikatakdang paghimo nang santos ni Calungsod.

Kini tungod kay ato siyang paisano nga gituohan nga usa ka lumad nga Bisaya.

Bisan og wala pay kongkretong ebidensya, apan ang kadagkuan sa Simbahan sa Sugbo kombinsido nga Bisaya si Calungsod. Dunay pagtuo nga siya taga Loboc sa Bohol. May miingon nga siya taga Southern Leyte. Ang uban miingon nga taga Ginatilan, Cebu. Ang kanhi Arsobispo sa Sugbo nga si Ricardo Cardinal Vidal dako og pagtuo nga lumad nga taga Sugbo gayud si Calungsod.

Kon taga diin gyod ang kagikan ni Calungsod, kana nanginahanglan pa og igong pruweba sa mga tigpanuki-duki. Apan ikaduha lang nga mahinungdanon ang iyang kagikan, ang pinakadako og bili nga angay natong panaminan mao ang iyang kinabuhing diyosnon.

Matod ni Msgr. Ildebrando Leyson, postulator ug co-chairman sa Commission on Blessed Pedro Calungsod, nga si Calungsod usa ka batan-on nga sakristan ni Padre Diego Luis de San Vitores kinsa misangyaw sa pulong ni Kristo didto sa mga lumad sa Guam.

Ang mga lumad mipatay kang Calungsod ug Padre Diego niadtong Abril 2, 1672. Gituohan nga 17 anyos ang edad ni Calungsod sa dihang siya gipatay.

Apil sa mga maayong hiyas ni Calungsod mao ang sinserong pagpangalagad kang Kristo.

Wala niya usiki ang iyang pagkabatan-on sa dili mahinungdanong botang. Anaa kaniya ang dakong inspirasyon sa pagsangyaw sa pulong sa Diyos. Anaa kaniya ang kaisog nga mobarog sa ebanghelyo bisan pa og nakasugal ang iyang kinabuhi.

Sumala sa pipila ka mga tigpanuki-duki nga maluwas pa unta siguro niadtong tungora si Calungsod kon iya pang gibiyaan si Padre Diego. Apan nakig-unong siya kang Padre Diego isip mapaubsanong suluguon ni Kristo.

Unta, atong himuon nga ehemplo sa atong kinabuhi si Calungsod. Ang mga batan-on angayng moila kang Calungsod isip ilang modelo sa kinabuhing Diyosnon. Mosanay pa unta ang mga maayong mithi ni Calungsod.

u201dKamong tanan nga minahal sa Diyos sa Roma, usa usab sa mga pinili ni Kristo ug tinawag sa pagka Santos” (Roma 1: 6).

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph