Bañoc: Ikatulong SONA ni PNoy

KARONG adlawa, gikatakda nga mohatag sa iyang State of the Nation Address (SONA) si Presidente Noynoy Aquino.

Ang paghatag og SONA nahimo nang kabahin sa maayong pamatasan sa gobyerno diin ang Presidente mohatag ug saysay ngadto sa Kongreso sa nahimo sa iyang administrasyon.

Ang unang Presidente sa Pilipinas nga si Heneral Emilio Aguinaldo nihatag sa iyang mensahe sa Malolos Congress niadtong Septiyembre 15, 1898. Siya mipahalipay sa unang naporma nga mga representante sa Asya ug sa Pilipinas.

Apan ang gihimo ni Aguinaldo wala giisip sa mga tigpanuki-duki nga SONA.

Niadtong tungura, kinaugalingon nga independensiya ang gideklarar ni Aguinaldo nga wala ilha sa Espanya ug sa Amerika.

Gituohan nga ang unang SONA sa Pilipinas gihatag ni kanhi Presidente Manuel Quezon niadtong Hunyo 16, 1936 atol sa Commonwealth Republic sa dihang ang nasud nahimo pang ulipon sa Amerika.

Ang paghatag ug SONA gibotang sa 1935 Constitution diin ang Presidente may obligasyon sa paghatag ug saysay sa iyang administrasyon ig-abli na sa Kongreso.

Sa unang SONA ni PNoy niadtong Hulyo 26, 2010, iyang gipanghimug-atan ang iyang gitawag og ‘Matuwid na daa’.

Sa ikaduha niyang SONA niadtong Hulyo 25, 2011, sa makadaghang higayon nga iyang

gibalikbalik ang pulong ‘wangwang’ nga nagpasabot ug kahiwian sa panggobyerno.

“Sa matagal na panahon, naging simbolo ng pang-aabuso ang wangwang”, matud pa ni PNoy.

Karong adlawa, unsa kaha ang tema sa SONA ni PNoy?

Ang tigpamaba sa Presidente nga si Edwin Lacierda wala kaayo niklaro kon unsay tema sa SONA ni PNoy. Igo lang gipadayag ni Lacierda nga si PNoy sa iyang SONA molingi sa tulo ka tuig na nga panerbesyo ug molantaw sa dugang tulo ka tuig nga wala pa nahuman

sa iyang termino.

Atong sabton nga posibling isaysay ni PNoy ang mga maayong nahimo sa iyang administrasyon sulod na sa tulo ka tuig. Itug-an sab ni PNoy ang mga maayo niyang plano sa nasud sa nahabilin nga tulo ka tuig.

Dunay pagduda nga maapil sa SONA ni PNoy ang pagpasaka og kaso ug pagpa-hospital arrest ni kanhi Presidente Gloria Arroyo. Posibleng dili palabyon ni P-noy ang pagka-impeach ug pagkatangtang sa puwesto ni kanhi Chief Justice Reynato Puno.

Basin og ang nahitabo nila ni Arroyo ug Corona ang apil sa ipasigarbo ni PNoy nga duna nay agi ang iyang ‘Matuwid na daan’ ug nagmalampuson siya sa paglutos sa mga ‘wangwang’.

Paminawon nato ang SONA ni P-noy aron sa pagkonpirmar kon nagtug-an ba siya sa tinuod nato nga iyang ‘BOSS’.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph