Bañoc: Mga Sen. Enrile, Estrada, ug Revilla

DAGHANG nag-atang kon mapriso na ba sila si Senador Juan Ponce Enrile, Jinggoy Estrada ug Bong Revilla human mirekomendar ug midesisyon na ang Ombudsman nga pasa­kaan sila og kasong plunder.

Ang kasong plunder nalatid sa Plunder Law (R.A. 7080) diin nagtangag og silot nga reclusion perpetua, usa ka pinulungan nga Espanyol nga nagkahulugan og permanente nga pagkabilanggo. Ang u­nang tan-aw sa balaod nga ang mapasakaan niini nga kaso dili tugtan nga mopiyansa.

Sa mao nga balaod, ang opisyal sa gobiyerno nga nakapangawkaw sa kaban sa katawhan og P50 mil­yo­nes pataas, mahimong pasakaan og kasong plunder.

Ang Ombudsman mituo nga may lig-ong sukaranan nga pasakaan og kasong plunder sila si Enrile, Estrada ug Revilla. Wala mituo ang Ombudsman sa depensa sa tulo nga gipeke ang ilang pirma ug wala sila kaila sa mga testigo ug sa gianggaan og pork barrel queen nga si Janet Lim Napoles.

Sa kaso nga plunder, matod ni Assistant Ombudsman Asryman Rafanan nga si Enrile nakapangawkaw sa iyang pork barrel sa kantidad nga P172 milyones, P183 milyones si Estrada ug P242 milyones kang Revilla.

Gawas sa plunder, ang Ombudsman nag-andam og 11 ka kasong graft batok ni Estrada, 15 kang Enrile ug 16 batok ni Revilla. Nasuta sa Ombudsman nga nawaldas pod ni Estrada ang iyang pork barrel nga balor og P278 milyones, P345 milyones ni Enrile ug P517 milyones ang kang Revilla.

Kabahin sa proseso nga kon masang-at na sa Ombudsman ang kasong plunder ug graft batok sa nahi­nganlang mga Senador ngadto sa Sandiganbayan, kini mopagawas og warrant of arrest aron sa pagdakop sa mga sinumbong.

Apan ang pangutana kon madakpan ba kaha sila? Ug kon madakpan man, masulod kaha sila sa prisohan?

Sila si Revilla ug Estrada tua nagbakasyon sa gawas sa nasod. Kon molusot na ang warrant batok nila, madakpan pa kaha sila? Nasayran nga si Revilla nangonsulta diay daan kang kanhi PNP Chief Ping Lacson kon unsaon sa pag-eskapo. Sa dihang gipangu­tana si Revilla, matod niya nga komedya ra nila ni Lacson ang mao nga istorya.

Ang nahabilin karon diri sa Pilipinas mao ang ilang Lolo nga si Enrile. Ug dakpon man si Enrile, dili kaha ni mokalit unya og sakay sa wheelchair aron tugtan nga ipaubos lang og hospital arrest?

Sa kadako sa buhis sa katawhan nga gitumbok nga nawaldas ug gipangkawat, makiangayon nga mangayo og hustisya ang katawhan batok sa nagkurbata nga mga kawatan.

Mas maayo nga naa nay makit-an nga hustisya ang katawhan sa dili pa matapos ang termino ni PNoy sa tuig 2016.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph