Bañoc: Mga way uwaw

UNSA may nasud sa utok sa  konseho sa siyudad nga wa man intawon mauwaw pagpalabang og usa ka resolusyon diin pas-anon sa mga magbubuhis ang pag-adto sa gym sa mga konsehal, mayor ug bise mayor. Nitibugsok na gyud pag-ayo  ang kalidad sa resolusyon nga ipasar sa konseho.

Ang pagdagko sa ilang braso o ang pagpagamay  sa ilang tiyan ug ilang hawak, ila pa gyud ipapas-an ni Juan dela Cruz. Nabutaan na ba sila sa gahum nga bisan ang ilang “vanity” ipapas-an pa man nila sa mga magbubuhis.

Wa ba sila makaila sa pong pagdaginot? Sunod niining ilang resolusyon, kon ato silang pasagdan, unsa may ilang ipapas-an sa mga tawo, ang ilang pagpamanicure ug pedicure, ang ilang pagpaplantsa sa ilang buhok, ug uban pa? Susmaryosep. Ila ning himuon bisan daghan ang gigutom, kabataan nga nangawat na lang kay way gikaon? Hain man gibutang sa atong mga konsehal ang ilang konsensiya.  

Wa pa sila matagbaw sa sweldo ug ang mga pribilihiyo sa usa ka konsehal? Kuwang pa ba ang pagburot sa ilang mga bulsa? Unsa may ehemplo nga ilang gipakita niining ilang gihimo? Kakuyaw kon manakod ngadto sa mga konseho sa barangay kining klase sa resolusyon nga gipasar sa konseho sa syudad. Unsa pa man unyay utlanan sa ilang pag-usik usik sa buhis sa katawhan.

Wa ba nila batia ang kapait sa pagpanginabuhi karong mga panahona? Nakasaksi na ba  sila sa pamilya nga nag-one day one eat? Wa ba sila makamatikod nga  daghay mga tawo nga 24 ka oras naglibot-libot sa siyudad namunit og basura aron lang mabuhi? Wa ba sila kahibawo nga daghan ang nangamatay sa ospital di tungod kay ila nang panahon, apan tungod sa kamahal sa tambal kay ang ospital mismo way ikahatag ngadto kanila.

Malamdagan unta sila sa Espiritu Santo ang atong mga konsehal aron di sila padayong mahimulag gikan sa kamatuoran ug nga unta mobalik pagtunob sa yuta ang ilang mga tiil.

Ang nakapa-shock nako kay ang nangamahan sa maong resolusyon, si Councilor Jose da Luz III, anak sa babaye nga mibarog sa pangpang-abuso sa gahom panahon ni Marcos, siya ang babaye nga gidayeg sa minilyon ka katawhan sa Kabisay-an ug Mindanao kay isog siyang misaway sa kapritso ni Imelda samtang nag-ilaid ang tibuok nasud sa tumang kalisod.

Kon buhi pa tingali si Inday Nita – puyra tandog—tingali iyang kuhiton si Jose da Luz III.

Hain na man sab ang pagka pro-urban poor ni Alvin Dizon? Daghan kaha sa iyang mga konstituwente maka-afford sa balayranan sa gym aron monindot ang ilang lawas. Wa man gani silay ikapalit og noodles ang pag-gym na hinuon?       

Ayaw intawon mo og palabi.

(birada_rupjhil@yahoo.com)   

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph