Bañoc: Nauso nga hagit

NAHIMO nang viral sa social media ug nabaniog sa tibuok kalibotan ang gitawag og ice bucket challenge. Kini ang hagit nga maligo sa ice aron makakuha og pundo sa may sakit nga amyotrophic lateral sclerosis (ALS).

Sumala sa mga panukiduki nga kini nga hagit nagsugod sa tuig 2013 sa Estados Unidos ug unang gitawag og cold water challenge. Apan wala pa maklaro kon kinsa gyod ang labing unang tawo nga nagpasiugda niini.

Apil sa mga inilang perso­nalidad nga miapil mao sila si kanhi U.S. President George Bush ug si U.S. President Barack Obama. Sa Pilipinas, nakaapil na sila si Justice Secretary Leila De Lima, Lea Salonga ug mosunod si Kris Aquino.

Ang nahiunang mga lagda sa challenge kay dunay mo-challenge nimo sa social media aron paapilon niini. Papilion ka kon moapil ka sa challenge o mohatag ka ug donasyon.

Mahimo sab nga imong pilion ang duha.

Sulod sa 24 oras human nimo gidawat ang challenge, kinahanglan nga duna kay video nga i-post sa internet nga naligo ka og ice. Ang dunasyon ihatag ngadto sa sa usa ka asosasyon sa ALS nga nakabase sa Washington.

Samtang ang Malacañang apil nga nanawagan natong mga Pilipino nga mosalmot sa challenge aron makatabang sa mga Pinoy nga nag-antos sa ALS.

Matod ni Deputy Presidential spokesperson Abigail Valte nga ang atong donasyon dili na mapunta sa gawas apan mahimong idiretso sa mga ospital sa gobyerno diin dunay mga pasyente sa ALS.

Apan may pahimangno ang Department of Health (DOH) diri nato nga dili basta-basta nga moapil sa ice bucket challenge. Kini tungod kay basin ug dili makaagwanta ang atong lawas sa kabognaw ug mameligro ang atong kinabuhi.

Maayo man ang konsepto sa mao nga challenge ug ako dili supak niini. Apan ang pangutana kon ngano man nga kinahanglan pang maligo ug ice aron makahatag ug donasyon?

Dili ba diay mahimo nga modiretso ka na lang ug hatag ug donasyon nga dili na nimo paantuson ang imong kaugalingon sa pagkaligo sa ice?

Ang tubag kay mahimo man. Kay bisan ug dili ka modawat sa challenge dili ka man obligado sa paghatag ug donasyon. Mahimo man nga imo lang ibalewala gani ang mo-challenge nimo sa social media.

Apan matud pa sa atong mga higala, mas maayo man kuno nga duna gyoy challenge. Kon modawat mo sa mao nga challenge, sigurua lang gyod ha nga nga makaagwanta ang inyong lawas sa tugnaw?

Pero kon duna may challenge sa paghatag, mao kana ang challenge nga dili na ta kinahanglan nga agdahon apan kaugalingon ug kinasing-kasing nato nga pagtabang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph