Bañoc: ‘Ninoy, hindi ka nag-iisa’

NIADTO untang Lunes nako ni igawas nga lindog, apan dihay nahitabo nga disgrasya sa Barili. Hinuon, kining akong hisgutan karon way giilang oras o panahon.

Niadtong Agusto 21 atong gihinumduman ang kamatayon (Agusto 21,1983) ni kanhi senador ug karon nasudnong bayani, Benigno “Ninoy” Aquino, amahan sa presidente sa  atong nasud nga si Benigno “Nonoy” Aquino.

Human sa pipila ka tuig nga pagpuyo sa Amerika, katuigan nga gihulagway ni Cory nga kinakamalipayon nga katuigan sa ilang pamilya, nidisidir si Ninoy nga mobalik sa Pilipinas aron hangyuon si Marcos nga ibalik ngadto sa mga Pilipino ang gihikaw nga demokrasya ug kagawasan. Siya nagtuo nga bisan unsa katig-a sa diktador o sa tawo aduna gihapoy gamayng Hesukristo nga nagpabilin sa kasingkasing niini.

Wa ug tuo ang mga imbitasyon didto sa Amerika aron siya mosulti batok sa diktador. Ug matag higayon nga siya mosulti iyang gilaksi ang maskara sa diktaduriyang pangamhanan ni Marcos sa tinuod nga hulagway niini. Kusog ang pag-organisa didto sa gawas batok ni Marcos, nga ibunanan usab sa pakigbisog sa mga mahigugmaon sa kagawasan dinhi sa Pilipinas.

Gibati ni Ninoy ang kinahanglang mouli siya, wa niya maantos nga kamingaw sa nasud niyang gimahal, nahisama sa isda nga nahimulag sa tubig. Busa,bisan supak ang iyang mga higala ug pamilya sa iyang desisyon nga hanggapon pagbalik ang preskong hangin sa iyang nasud, nisakay gyud siya sa eroplano.

Apan bisan diha sa eroplano, daw nasayod na si Ninoy nga mahimong adunay dautan nga mahitabo kaniya, kay iya man gani gisultian ang mga journalists nga magmaigmat.

Mapahiyomon — tingali dihay kabalaka sa iyang kasingkasing apan iya kining gitago — siyang nakig estorya sa ubang pasahero.Usa ka charismatic leader si Ninoy. Apan sama sa  tanan tawo nga tinood nga nahigugma, tam-is alang kaniya ang paggakos sa kamatayon makabt-ot lang ang mga tinguha nga mas labaw pa sa kaugalingon interes. 

Ug wa masayop ang iyang mga higala ug pamilya, gipusil siya pag-abot niya sa airport.

Mihilak ang tibook nasud. Mas nilanog sa tibuok nasud ang singgit sa kagawasan. Daw di na kalihok ang tawo sa gidaghanon sa mga nihatod nga kaniya sa lubnganan. Kinsay makalimot sa, “NINOY, HINDI KA NAG-IISA” slogan nga nagpadayag nga, “Oo, naghilomhilom  kami sa kahadlok, apan gimahal namo ang kagawasan. Apan karon sa imong pagpanaw, andam na kaming mobuhis usab sa among kinabuhi.

Giadlaw-adlaw na hapit sa atawhan ang martsa, nidilaab ang kaayo sa pakigbisog.

Hangtod nga nagkapuliki ang diktatador ug niadtong 1986 bisan sakit sa iyang buot, nagpatawag siya og snap election. Ang asawa ni Ninoy nga si Cory Aquino maoy gustong padaganon sa katawhan; ang tradisyonal nga oposisyon andam na, apan si Cory maoy simbolo sa biktima sa inhustisya.

Bisan hain siya moadto, ang siyagit nga inubanan sa pagtulo sa luha sa nasud nga nabilanggo mas lanug pas dalugdog, “Cory, Cory, Cory!”

(birada_ruphil@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph