KARONG bowana, gisaulog ang Women’s Month agig pag-ila sa dakong papel sa kababayen-an sa kalamboan sa katilingban. Kagahapon, gisaulog usab ang International Women’s Day. Dili malalis nga dako kaayo ug natabang sa nagkadaiyang matang sa paglambo ang kababayen-an.
Bisan sa pagsugod pa lang ug himo sa Diyos sa kalibotan ug sa mga linalang niini, namatikdan sa Diyos nga wala nagmalipayon ang tawo. Busa, iya kining gipakatulog ug gihimuan ug kauban nga sarang makalipay ug makaabag kaniya nga mao ang babaye.
Pagmata sa tawo, nalipay siya ug nakatuwaw sa pag-ingon : “Siya karon ang bukog sa akong bukog, ug ang unod sa akong unod.” (Henesis 2 :23)
Apil sa dakong papel sa kababayen-an mao ang pagpanganak. Bisan sa kamoderno na karon sa siyensiya, wala pa naimbento ang kaalam nga mahimong magsabak ug makapanganak ang usa ka lalaki.
Ang siyam ka buwan nga ang babaye magsabak dili sayon nga kasinatian. Sa pagsabak, daghang mga babaye ang nangamatay. Sumala sa usa ka pagtuon, matag adlaw dunay labing minus 800 ka mga babaye ang mamatay tungod sa pagmabdos ug sa pagpanganak.
Human nakasala sila si Adan ug Eba ug gipalayas sa Diyos gikan sa paraiso, ang karaang kultura nagpakita sa dili paghatag ug igong bili sa kababayen-an. Kini gumikan sa karaang pagtuo nga ang babaye maoy unang nahulog sa pagpakasala ug nanintal sa tawo sa pagsupak sa kabubut-on sa Diyos.
Apan si Kristo miusab sa mao nga kultura gumikan ni Birhen Maria nga gihimo niyang inahan. Gamhanan ang Diyos ug mahimo nga si Kristo, iyang pakaliton ug tunga sa kalibotan. Apan ang Diyos wala nanglaktod ug migamit sa natural nga proseso sa pagkatawo. Pinaagi ni Birhen Maria, ang babaye nakahimo ug dakong papel sa kaluwasan.
Dunay panultihon nga: ‘In every rise and fall of a man, there’s always a woman behind’. Sa ato pang pinulungan : ‘Sa matag pagsaka ug pagkalukapa sa lalaki, anaa kanunay sa iyang luyo ang babaye’.
Si Dr. Jose Rizal unang nagplano nga mokuha sa kursong abogasiya. Apan iyang giusab ang iyang plano ug mikuha ug medisina tungod sa usa ka babaye nga walay lain mao ang iyang inahan nga si Teodora Alonso. Si Tedora niadtong tungora nakasinati ug pagkahalap nga maoy nakaaghat ni Rizal sa pagtungha og medisina.
Ang mangugubat kaniadto sa Israel nga si Samson gitagaan sa Diyos ug talagsaong kusog nadakpan sa iyang mga kaaway human natintal sa ulug-ulog sa babaye nga si Delilah.
Kitang mga lalaki, atong pahalipayan ug mosaludo kita sa atong kababayen-an.