Bañoc: Pildi ba gyud si Pacman?

SAKTO gyud si Hall of Famer Coach Freddie Roach sa iyang tambag sa Pambansang Kamao nga ang labing maayong paagi ni Manny Pacquiao sa pagdaog mao ang pag-knockout ni Timothy Bradley.

Mahimong masayop ko sa akong panan-aw, apan sa akong tan-aw walay bisan usa ka round nga nadag-an si Bradley sa ilang away kagahapon ni Pacman sa MGM Grand, Las Vegas Nevada.

Sa pagsugod pa lang sa round, kla­rong naglisod si Bradley sa pagsagang sa mga nanglupad nga kumo ni Pacman.

Nakaigo man si Bradley kang Pacman apan klaro nga wala kaayo ni nakatay-og sa Pambansang Kamao.

Daghan nga mga round nga nabarag si Bradley ug hapit natumba gumikan sa mga solidong kombinasyon sa mga kumo ni Pacman.

Apan dako na lang natong katingala kay ang hukom sa mga hurado usa ka split decision pabor kang Bradley.

Si Jerry Roth mihatag ug score nga 115 -113 pabor kang Pacman. Samtang sila si Duane Ford ug C.J. Ross mi-score ug 115-113 pabor kang Bradley.

Lahap siguro kaayo kong mangistorya nga moingon nga surambaw ang ilang hukom kay sila mga U.S. citizens ug didto daan nakapusta sa ilang paisano nga si Bradley.

Basin ug sila si Ford ug Ross lahi lang gyod ug panan-aw sa dowa nila ni Bradley ug Pacman kay sa kadaghanan nato nga mga Pinoy ug sa ubang wala nakauyon sa ilang hukom.

Pero ang mas nahibawo sa away daog ba siya o wala mao mismo si Pacman.

Matud ni Pacman nga siya nagtuo nga midaog siya kang Bradley. Iya kining napamatud-an gumikan kay ma-klaro nga gikutasan si Bradley ug nagpanglipong sa dihang nasabak ang nawong ug tiyan sa mga gahing kumo sa Pambansang Kamao.

Matud ni Pacman nga tinuod nga lig-on si Bradley apan wala kaayo siya sakiti sa gipangbuhian nga mga kumo.

Akong hulman ang tali sa Sports Hub nga nagpakita nga sa dose ka round, upat lang niini ang nadag-an ni Bradley. Kini mao ang sa round 6, , 10, 11 ug 12. Samtang walo ka round ang nadag-an ni Pacman.

Ang paagi sa pag-score mao nga hatagan ug 10 puntos ang makadaog nga boksidor ug 9 sa mapildi. Kon ma-knockdown ang kontra, 10 ang ihatag nga puntos sa midaog nga boksidor ug 8 ang napildi.

Kagahapon, ang puntos nga 10 ug 9 mao ra ang giilogan sa duruha sa matag round kay walay bisan usa nila ang natumba.

Sa hukom nga pildi si Pacman, dili nato mabasol ang kagdaghanan nga magdoda nga surambaw ang desisyon.

Dunay pagduda nga kagahapon, ang nagduwa dili lang si Pacman ug Bradley apan apil na ang mga dagkong sugarol sa Las Vegas. Nakakontrata naman gud daan ang rematch ni Pacman ug Bradley. Mahalin pa ba gud ang rematch kung napildi pa si Bradley?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph