Bañoc: Premyo sa basurero

NATUGYAN na sa kapolisan sa Man­daue ngadto kang Mayor Jonas Cortes ang kabahin sa nakit-an nga mga alahas sa basurahan sa Umapad. Mga P2 milyones diay ang balor sa nawagtang nga mga alahas sa nangangkong tag-iya nga si Vicente Tan.

Tulukibon pa kaayo ug unsang hitaboa nga natam-ok diha sa Umapad dumpsite niadtong Enero 12 ang mahalong mga alahas. Niadto nang Enero 17 nadiskobrehan sa mga polis nga may mga alahas nga nakuykoyan sa mga basurero.

Unang midangop sa programang ‘Straight To The Point sa dyHP’ ang mga basurero nga sila si Rodrigo Corta, Antonio Cuizon ug Eda Montecalbo. Kini tungod kay human sila makatilaw kadali pagka mil­yonaryo, wala na sila katulog tungod sa kahasol nga mabilanggo o masakeron tungod kay matud pa giholga sila sa mga nagpailang polis. Akong personal nga nakita ang pagkainosente sa ilang panagway.

Sa akong live interview ni Atty. Inocencio Dela Cerna, abogado sa nagpailang tag-iya, giklaro niini nga wala silay plano nga pasakaan ug kaso ang mga basurero ug gani ila pa kining hatagan ug premyo sa pagkakaplag sa mga alahas. Nisanag intawn ang panagway sa ma inosenting basorero.

Ang atong Kodigo Sibil diha sa Article 719 ug 720 nagkanayon nga kon makakita ka ug botang nga dili imo, imo kining iuli ngadto sa tag-iya. Kon wala mailhi ang tag-iya, imo kining ideposito ngadto sa Mayor sa lungsod o dakbayan diin napalgan ang botang.

Ang Mayor moanunsyo sulod sa publiko sulod sa duha ka semana kalabot niini. Kung walay moangkon nga tag-iya human sa kataposang pag-anunsyo sa Mayor, magpaabot ug laing panahon sulod sa unom ka bowan nga dunay mo-claim nga tag-iya. Human sa unom ka bowan nga wala gyoy mopakita nga tag-iya, maiya na sa nakakaplag ang napalgan nga botang.

Pero ug motunga sa gitagal nga panahon ang tag-iya, unsay iyang obligasyon? Article 720 sa atong New Civil Code, “If the owner should appear in time, he shall be obliged to pay as a reward to the finder, one-tenth of the sum or of the price of the thing found.” Ug atong i-apply ang mao nga balaod ngadto sa mga basurero sa Umapad, may obligasyon ang pamilyang Tan sa paghatag ug 10 porsiyento nga premyo sa balor sa na-recover nga mga alahas. Maayo ug kining balaora sa paghatag ug premyo ang atong sundon.

Related Stories

No stories found.
SunStar Publishing Inc.
www.sunstar.com.ph