ATO na usab gihandum ang Semana Santa kon balaang mga adlaw sa pamalandung sa pagpasakit ug kamatayon sa atong Ginoong Jesukristo.
Matag semana santa, pipila sa mga sikat nga characters sa Biblia mao sila si san pedro ug Judas. Daghang butang nga pareha silang duha, apan duna usab silay dakong kalahian.
Pareha sila isip mga suod nga higala ni Jesukristo sanglit sila mga apostoles man.
Pareha usab sila nga mga sinaligan ni Kristo ug sa ilang grupo sa mga apostoles sanglit nagkupot man sila ug sinsitibo nga mga posisyon.
Si San Pedro sinaligan kay siya man ang lider sa mga apostoles, ug gihimong piniyalan ni Kristo (Jn. 21:15; Mt. 16:18-19). Samtang si Judas usab sinaligan kay siya man ang tresorero sa grupo sa mga apostoles, sa ato pa gisaligan sa kwarta (Jn. 12:6; Jn 13:29).
Apan silang duha ka mga sinaligan pareha nga nakasala pinaagi sa pagbudhi kang Jesus.
Si Judas nga kawatan ug korap nibaligya ug nagbudhi ni Jesus sa kantidad nga 30 ka silver (Mt. 27:3). Samtang si San Pedro nilimod ug nagbudhi ni Jesus tungod sa kahadlok (Jn 18:15-27).
Si San Pedro maayo lang sa atubang, apan lahi ang iyang gisulti sa dihang wala si Jesus sa iyang atubangan. Nanumpa pa siya sa atubangan ni Jesus nga andam siyang magpakamatay alang niini. Apan sakto si Jesus pag-ingon “dili pa gani motuktugaok ang manok sa makausa imo na akong ilimod sa makatulo.” (Lk 22:34). Si San Pedro maayo lang sa atubang apan dali nga naka balingbing.
Kung atong tukbilon ang Biblia, nagpasabot nga sila si San Pedro ug Judas parehas nga nakahimo ug dagkong sala batok sa magtutudlo nga si Jesus. Pareha silang naka amgo nga nakasala.
Ang kalainan mao nga si Judas wala mangayo ug pasaylo, wala maghinulsol ug nag-usab sa iyang kinabuhi. Naghikog hinuon kini (Mt. 27:5). Apan sa laing bahin si San Pedro, nagbasol sa sala nga iyang gihimo, nangayo ug pasaylo sa Ginoo ug nag bag-o. Tungod niini gipasaylo siya ug gani gipadayon ang iyang pagkapiniyalan isip lider. “Atimana ang akong mga kernero” si Jesus miingon. (Jn. 21: 15-19).
Sa atong panahon karon, daghan usab kanato ang sama ni Judas nga ibaylo ug ibaligya ang ginikanan, igsoon, higala, ug dungog gumikan sa korapsyon ug kwarta. Daghan usab kanato ang sama ni san Pedro nga maayo lang sa atubang apan kusog manglibak sa talikod. Sa laktod ako nga nagsuwat niining lindog ug ikaw nga mibasa niini parehang makasasala.
Niining semana santa, maayo nga atong pamalandungan ang mga panghitabo sa Biblia nga adunay dakong kalambigitan sa atong panahon karon.
Atong angkonon sa tumang pagpaubos nga kita sama nila ni San Pedro ug Judas nga makasasala. Apan human sa pagka sala, maayo nga atong sundon si San Pedro ug dili si Judas.
