Bañoc: Suroysuroy sa Amerika

INGON nga nabangkarota ang Kapitolyo atol sa administrasyon ni kanhi Gobernador Gwen Garcia.  Kini maoy kontrobersiyal nga isyu sa dihang nagsingabot ang milabayng pinilay. Gani, daghan ang mga contractor nga nagpanon sa Kapitolyo aron maningil sa utang niini.

Apan ngano man nga magpanon ang napulo ka mga board member sa pagbiyahe ngadto sa New York alang kuno sa study tour sa drug rehabilitaion center? Dili ba kini pagwaldas sa kaban sa katawhan?

Nganong gitugtan man ni Gobernador Hilario Davide III ang  napulo nga magdungan og study tour diin matag usa gastuhan og 1,500 dolyares?

Kon P64,500 ug sa napulo mosumada ang tanan og P645,000.

Apan sa pasiuna pa kana nga gastuhan sa ilang biyahe ngadto sa New York nga naglangkob sa seminar fee ug round-trip ticket.  Wala pa nay  labot sa bayad sa ilang magasto sa okupahan nga hotel ug sa ilang kaon ug inom. Dili ko moingon nga manginom silang tanan og ilimnong makahubog apan ang uban nila labing sigu­ro nga moinom kay magpahilis sa ilang gikaon.

Si Davide mamon kaayo ang kasingkasing nga mitugot sa biyahe sa mao nga board members ug mii­ngon sa iyang suwat:

“You are authorized to charge all expenses for travel and room accommodations and such other expenses relative thereto against the available funds of your res­pective offices, subject to the usual accounting and auditing rules and regulations.”

Atong hubaron ang suwat ni Davide sa Binisaya:

u2018Kamo gitugtan sa pagbayad sa tanan ninyong magasto sa inyong biyahe ug sa giokupahan nga lawak ug uban pang galastuhan nga may kalambigitan niini ngadto sa nahabiling kuwarta sa inyong mga isig opisina, ubos sa naandan nga pagkuwenta ug mga pamaagi ug lagda sa pagsumada.’

Akong nahinabi si Board Member Gigi Sanchez - Zaballero atol sa akong programa ‘Straight to the Point’ sa dyHP. Matod ni Zaballero nga mahinungdanon kaayo nga makakat-on sila sa mga epektibong paagi didto sa New York alang sa pag-rehabilitate sa kinabuhi sa adik sa drugas.

Ako uyon nga magkat-on ang atong mga opisyal sa mga pamaagi didto sa gawas sa nasod alang sa pag-atiman sa naboang sa bisyo sa drugas. Apan nganong napulo man gyod sila ang moadto? Dili ba giangkon man ni Bokal Zaballero nga mahimo ra nga siya lang usa o duha sila nga moadto aron makaminos og gasto ang Kapitolyo?

Hinaot nga mausab ang hunahuna sa ubang board members ingon man si Davide. Ato silang pahinumdoman nga daghan ang nakasaway ni kanhi Gobernador Gwen Garcia gumikan sa Suroy-Suroy Sugbo gumikan kay kini gastuso. Nan kining pag-adto sa Amerika sa napulo ka mga bokal dili ba kini mas labaw pang gastuso? Dili ba kini matawag nga suroysuroy sa Amerika?

Kon madayon ang pag-adto sa Amerika sa 10 ka board members, nan walay sisyon nga mahitabo sa Sugbo kay dili man ma-quorum ang nahabilin kay ang quorum tua man sa Amerika. Palabihon ba diay nila ang suroysuroy sa Amerika, kay sa ilang trabaho nga pagpahigayon og sesyon?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph