Barangay police gisagpa sa kapitan mireklamo

TAGUM CITY -- Midangop sa kuwerpo sa kapulisan ang usa ka sakop sa baragay police sa Barangay East human nga gisagpa sa ilang barangay kapitan atubangan sa 10 anyos niyang anak babaye alas 6 sa buntag niadtong Dominggo.

Giila ang biktima nga si Angelito Bacalso, 32, minyo, molupyo sa Malinawon 2, Barangay East, Tagum City, samtang ang gitudlong responsable sa pagpanagpa mao mismo ang kapitan sa barangay nga si Boy Neo didto sa iyang panimalay.

Kagahapon naatlan sa Superbalita si Bacalso nga atua sa sulod sa Tagum City Police Station (TCPS) aron nga itaho ang iyang gidangatan.

Matud ni Bacalso nga giuli lang niya ang iyang uniporme sa barangay police didto sa bay sa kapitan.

Apan sumala pa nasuko Neo tungod kay dugay niya kini mauli dayong sagpa sa wala niyang aping.

Mas nasubo si Bacalso tungod kay gipatanggal sab siya sa kapitan isip pintor sa bag-ong mall sa Tagum.

"Igo-igo gyud nanginit ang akong dalunggan, una gisagpa akong kalo nalagpot ikaduha sa ako na gyud nawong ug dili pod ka kasukol kay naa man ko sulod sa ilang balay," sumbong ni Bacalso sa pulis.

Nasayran nga si Bacalso buot nang mohawa pagka-barangay police tungod sa kagamay sa suweldo ug nagpatabang kang Neo nga makasulod og trabaho.

"Una naglagot kuno siya tungod kay nganong dugay daw nako giuli ang uniporme kay kung giuli nako'g sayo dili daw ko niya tanggalon sa mall," tin-aw ni Bacalso.

Dugang gitug-an ni Bacalso nga nakakita ang iyang anak babaye sa maong hitabo hinungdan nga mihilak kini.

Nabati sab sa bata ang pagpamalikas sa kapitan pinaagi sa pag-ingon nga, "Gahi man god ka." (Teddy Cabana)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph