Barrita: Dilatory tactics sa depensa ni CJ Corona?

WA mahimuot si Senador Ping Lacson sa pagsigig objection sa depensa sa nagpadayong bista sa kasong impeachment batok ni Supreme Court Chief Justice Renato Corona sa Senado.

Daghan kaayo ang mga objection sa depensa ug mao kini ang makapugong, matod pa niya, sa paspas nga hustisya.

Nakalimot tingali si Senador Ping Lacson nga ang Senado, sa pagbista sa kaso batok ni Corona, nahimong usa ka korte ug busa, kinahanglan nga motuman sa rules of court, madugay man o madali.

***

Si Lacson, nga nahimong hepe sa Philippine National Police sa panahon ni kanhi presidente Erap Estrada, niingon nga nasayod siya sa mga proseso sa korte tungod sa iyang kasinatian isip usa ka pulis.

Ang mga kabos nga mokiha moatras sa kaso inig kahurot sa ilang tinigom tungod sa mga legal technicalities nga makalangay sa pagresolbar sa kaso.

“Now I understand why poor litigants seek justice outside the courtroom, either by taking the law into their own hands to settle their case against a rich and powerful respondent, or turn to the New People’s Army kangaroo court,” niingon si Lacson.

Gusto diay niya nga mahimong usa ka kangaroo court ang Senado?

***

Angay tingaling tan-awon ni Senador Lacson kon nga nganong nakahigayon ang depensa sa pagsigig objection.

Di kaha tungod kini kay wa makapangandam ang mga prosecutors sa impeachment batok ni Corona?

Gani, niangkon si Quezon Rep. Erin Tañada, tig­pa­maba sa House prosecution panel, nga ang mga  House prosecutors karon pa nakat-on sa nagpadayon nga impeachment trial.

“The impeachment proceedings are a learning experience for us. We have to relearn trial techniques like the presentation of evidence. We will get better as the

impeachment trial progresses,” matod pa niya.

Basin na lang nga inig ka human sa impeachment trial, makamao na sila.

***

Si Senador Tito Sotto, majority leader sa Senado, niingon nga kinahanglan nga hatagan ang depensa og kahigayonan sa pag-isa sa ilang mga objection aron di ingnon nga gi-railroad ang impeachment trial.

“How can you stop them if they think there’s something objectionable? Objections can’t just be prevented, otherwise that’s no longer a trial. When the defense’s turn to present evidence comes, won’t the other side pose objections?” nagkanayon si Sotto.     

Maayo gani kay usa ra sa depensa ang sigig object, si retired Supreme Court Associate Justice Serafin Cuevas, ug ang iyang gisigihag object ang iyang estudyante sa remedial law sa Far Esatern University, si Cavite Rep. Elpidio Barzaga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph