Barrita: Hapit makadaog si Manny Pacquiao

GILANGKAT ni Timothy Brad­ley gikan kang Manny “Pacman” Pacquiao pinaagi sa split decision ang World Boxing Organization welterweight title human sa 12 rounds sa ilang away kagahapon didto sa MGM Grand sa Las Vegas sa Estados Unidos.

Si Judge C.J. Ross ug Judge Duane Ford mihatag sa score nga 115-113, pabor kang Bradley samtang si Judge Jerry Roth mihatag sa score nga 115-113, pabor ni Pacman.

Ang mga fans nga di maka­dawat nga napildi si Pacman kay wa siyay pildi-pildi sud na sa kapin sa pito ka tuig, niingon na lang nga “Hapit gyud makadaog si Pacman.”

***

Na-shock si Pacman sa desisyon sa mga huwes kay nagtuo siya nga siyay nakadaog sa ilang away batok ni Bradley. Apan gitahod niya ang desisyon ug andam siyag rematch

kang Bradley. Sinumbagayon lag usab.

Sumala sa fight statistics sa Compubox, si Pacman nakaigo ug 253 sa 751 nga gibuhiang kinumo o 34 porsento nga connect rate. Si Bradley nakaigo lang og 159 sa 839 nga gibuhiang kinumo o connect rate nga 19 porsento.

Labaw og 94 ka kinumo si Pacman, gawas nga mas kusog pa ang mga kumo ni Pacman nga nakaigo ni Bradley.

Lisod lago kon di lang si Bradley ang kontra ni Pacman, hasta ang mga huwes.

***

Ang mga eksperto sa boksing di makatuo sa kapildihan ni Pacman. Ang Yahoo! Sports, si Tim Dahlberg sa Associated Press ug si Steve Carp sa Las Vegas Review-Journal mihatag sa score nga 117-111, pabor kang Pacman.

Si Dan Rafael sa ESPN mihatag sa score nga 118-110, pabor kang Pacman. Samtang si Harold Lederman sa HBO mihatag sa score nga 119-109, pabor ni Pacman.

Sama sa naandan, hilom ang tibuok Sugbo atol sa away ni Pacman ug Bradley kagahapon. Nisamot ang kahilom sa pagkapildi ni Pacman.

Pero ang kontrobersyal nga desisyon sa mga huwes maoy gisumsoman sa mga imnanan.

***

Daghan sa mga nanan-aw sa away ni Pacman ug Bradley nalipay sa dihang nakakita nga nanguros si Pacman. Sa ato pa, Katoliko gihapon siya, matod pa nila. Wa pa diay mobalhin og tinuohan.

Dugay na nga nagsugod og sermon si Pacman. Nagbag-o na siya, matod pa niya. Pero duna pay mga pagtulon-an sa Bibliya nga wa pa makatuhop ni Pacman kay boksidor pa man siya.

Sama pananglit sa pagtulon-an nga nag-ingon nga kon sumbagon ang imong wala nga nawong, itaon ang tuo nga nawong. Kon nituo pa si Pacman niana, manghuboy unta sa bun-og ang iyang nawong.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph