NAMAHAYAG si Cebu City Mayor Mike Rama nga iyang i-veto ang ordinansang gipasar sa konseho nga nagtugyan ngadto sa Punta Princesa Manggahan Homeowners’ Association sa pagdumala sa covered basketball court sa Sitio Manggahan, Barangay Punta Princesa, dakbayan sa Sugbo.
Ang upat ka mga konsehal nga alyado ni Mayor Mike Rama nibotar batok sa maong
ordinansa apan outnumbered sila sa 14 ka mga konsehal nga sakop sa Bando Osmeña Pundok Kauswagan (BOPK).
Nagsalig sa gidaghanon ang mga konsehal sa BOPK kay hastang basketball court itugyan na man ngadot sa usa ka pribadong pundok.
***
Ingon sa dunay kalambigitan kining maong ordinansa sa taliabot nga eleksyon sa barangay. Unsa ba guy labot sa konseho sa basketball court sa Punta Princesa? Gawas lang kon di supporter sa BOPK ang kapitan sa maong barangay.
Si Cebu City Councilor Hans Abella, usa ka abogado niingon, “I believe this is a Cebu City-owned property and cannot be assigned to private entities who are not accountable.”
Daghang mahitabo kon taliabot na ang usa ka eleksyon. Tiaw mo na, hastang covered basketball court sa usa ka barangay giawayan na?
***
Si Barangay Captain Jose Navarro sa Barangay Punta Princesa ning siyudad sa Sugbo, sa usa ka taho sa The Freeman, niingon nga naglaraw siya nga mopasakag kasong graft batok sa 14 ka mga konsehal nga nibotar sa pagpasar sa maong ordinansa sa Ombudsman for the Visayas.
Matod pa niya, ang Department of Public Works and Highways, nga maoy nagtukod sa covered court, ni-turn over niini ngadto kang Mayor Rama.
“Dili man na mahimo nga ang butang sa gobyerno, pribado ang modumala. Kung di ko mo-insister , kami say madaot,” matod pa ni Navaroo. Di lang kay madaot, gikuhaan gyud og gahom ang kapitan.
***
Matod pa ni Cebu City Councilor Mary Ann de los Santos, nakalapas ang maong ordinansa sa Section 375, paragraph B, RA 7160 (Local Government Code) nga naglatid nga ang tanang mga building ug mga physical structures ubos sa accountability ug responsibility sa mayor.
Ang Sangguniang Barangay mao usab ang gitugyanan sa pagdumala sa usa ka multi-purpose hall, multi-purpose pavements, grain or copra dryers, patios ug ubang post-harvest facilities; barangay waterworks, parking areas ug ubang similar facilities nga gitukod ginamit ang pundo sa gobyerno sud sa hurisdiksyon sa barangay.
Pero natukod kini ginamit ang P2 milyunes nga pundo gikan sa pork barrel ni kanhi kongresista Tomas Osmeña. Nagtuo mo nga igo lang nga moila ang kongresista sa proyekto? Sa atong nakita, ang kongresista gihapon ang magbuot kinsa ang modumala sa nahuman nga proyekto.