Barrita: Kamatayon sa usa ka diktador

GIBUNLOT siya gikan sa imbornal. Giisa niya ang iyang mga kamot ug nagpakiluoy: ‘Don’t kill me, my sons.’

Mao kana ang katapusang pangaliyupo ni Moamar Gadhafi. Paglabay sa usa ka oras, patay na ang kanhi diktador sa nasod sa Libya. Ang mga katawhan sa Libya naghudyaka.

Gipangbunlot  ang mga buhok sa diktador ug giparada ang iyang duguon pang lawas sa ibabaw sa dung sa usa ka trak.

Kini mao ang paghulagway sa Associated Press sa taho niini gikan sa Sirte, Libya, ang  gigikanan ni Gadhafi human kini mapukan sa mga rebolusyonaryo.

***

Di katuohan nga sa ingon nga paagi mapukan ang usa ka diktador. Makahinumdom kita nga si Julius Caesar gitabangan og dunggab sa iyang mga kauban sa Senado didto sa Roma.

Sumala pa ni Marcus Junius Brutus, “Sic semper tyrannis (Thus always to tyrants).”

Hinumdumi nga si Brutus giila pa gani ni Julius Caesar nga sama sa iyang anak. Labaw pa kon ang usa ka diktador wa na tahora sa katawhan. Usa kini ka dakong leksyon sa tanang katawhan ilabi na sa usa ka demokrasya kay nagpabilin gihapon ang mga tentasyon sa usa ka diktadorya.

***

Ang akong napanid-an mao nga dunay susamang panghitabo nga naglimin sa mga diktador sa Middle East.

Si Saddam Hussein sa Iraq nasakpan nga nagtago ilawom sa usa ka lungag nga gihulagway nga morag puy-anan sa ilaga. Si Gadhafi nasakpan nga nagtago sa laing lungag, sa usa ka imbornal.

Way nakasulti nila nga di maayo nga magtago sa usa ka lungag. Mas maayo pa man tingali kadtong nipuga sa prisohan unya wa gyud masakpi kay sa iyang pag-ikyas ang iyang nasakyan pison nga hilabihan kahinay nga modagan.

***

Atong maaninaw ang nahitabo sa mga diktador nga di andam nga mohiklin sa ilang gahom.

Tingali mao kini ang nakalahi ni kanhi diktador Ferdinand Marcos. Di na lang kita maghisgot sa mga biktima sa Martial Law kay hangtod karon nagpabilin pang nag-umido sa ilang mga kasingkasing ug galamhan ang mga abuso nga ilang nasinati atol sa madulom nga kagabhion sa martial law.

Apan sa dihang nialsa na ang katawhan kay wa na kaagwanta sa pag-abuso, gipili ni Marcos ang paglayas sa Pilipinas aron kalikayan ang usa ka duguon nga rebolusyon.

Ang nahitabo mao nga wa siya malubong ug gisulod na lang sa usa ka refrigerated crypt didto sa Ilocos Norte.

Nagpaabot nga dunay presidente nga mosugot nga malubong siya sa Libingan ng mga Bayani. Mahitabo tingali na kon ang iyang anak, si Senador Bongbong Marcos mao na mismo ang presidente sa Pilipinas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph