Barrita: Mga Pinoy nga marinero

ADUNAY kapin sa 400,000 ka mga Pilipinong marinero nga nagtrabaho sa gawas sa nasod, luwan sa nagkadaiyang mga dagkong barko nga nagtadlas-tadlas sa kalawran. Mokabat kini sa 35 ngadto sa 40 porsiyento sa tanang mga marinero sa tibuok kalibotan.

Dugang pa niini, adunay 60,000 ka mga marinero nga nagtrabaho sa mga barko nga nagbiyahe sud sa Pilipinas. Takwahaw lang nga moabot ang panahon nga ang mga Pilipino

maoy pagailhon nga hari sa kadagatan.

***

Si Kalihim Joseph Emilio Abaya sa Department of Transportation and Communication (DOTC) niingon nga dakog natampo sa atong ekonomiya ang mga Pilipinong marinero nga nagtrabaho sa gawas sa nasod.

Gikan sa buwan sa Enero ngadto sa buwan sa Nobiyembre sa miaging tuig, ang Bangko Sentral ng Pilipinas mitaho nga ang mga sea-based overseas Filipino workers (OFWs) nipadala og US$4.765 bilyunes nganhi sa Pilipinas. Mokabat kini sa P213 bilyunes.

Ang mga trabahanteng Pinoy nga naglutawlutaw sa kadagatan ug kalawran dakog natabang sa pagpalutaw sa atong ekonomiya.

***

Unsa may gihimo sa atong gobyerno isip tugbang sa natampo sa atong mga marinero?

Sumala pa ni Kalihim Abaya, mao kini ang pagpasar sa  Republic Act 10635. Ubos sa maong balaod, ang Maritime Industry Authority (Marina) mao na ang bugtong ahensiya nga modumala sa tanang butang may kalabotan sa mga marinero ug mopatuman sa 1978

International Convention on Standards of Training, Certification and Watchkeeping for Seafa­rers, or the STCW Convention.

Usa na lang ka ahensiya imbis nga mag-agi pa sa  Professional Regulations Commission, Commission on Higher Education, Technical Education and Skills Development Authority, Department of Health ug National Telecommunications Commission.

***

Tingali angay sab nga tan-awon sa DOTC ang kahimtang sa atong domestic shipping industry. Sama pananglit nganong pulos man mga second hand ang atong mga barko nga nagbiyahe sa Pilipinas.

Karaan nga mga barko, karaan sab nga mga makina. Busa kadaghan na mahitabo nga mopalyar ug motiurok ang makina sa taliwa sa lawod ug moresulta sa grabeng kalisang ug kakuyaw sa mga pasahero, labi na sama namong di makamaong molangoy.

Ang uban, duol na unta sa pantalan pero magbangga pa gyud. Di lang kay kuyaw kay nikalas pa man gyud og daghang mga kinabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph