Bata gitipi; atay gikaon sa uyoan

GIKILAW ang atay sa 6 anyos nga batang babaye ug giasinan pa sa iyang uyoan human siya gipatay kagahapon sa kaadlawon sa Barangay Villahermosa, lungsod sa Tabuelan, Sugbo.

Si PO2 Winston Ybañez, desk officer sa Tabuelan police nga nahinabi sa Sun.Star Superbalita, niila sa biktima nga si Lara May Concoles, kinsang tinai nahabwa human gihiwa sa iyang uyoan ang iyang tiyan.

Ang suspek nga si Efren Matedio, 29, ulitawo, kanhi construction worker ug giingong meyembro sa kulto, manghod usab sa inahan sa biktima, nakaeskapo ug wa pa madakpi sa kapulisan sa pagsuwat ning taho.

Matod pa ni Ybañez nga ang apuhan sa biktima nga si Pablita nibutyag nga sa wa pa ang krimen, ang suspek niagni sa bata nga magtupad sila sa pagpangatulog, apan ang biktima wa mosugot hinungdan nga nasuko ang suspek.

Tungod sa kasuko, si Pablita gipahimungtan, siya giyatakyatakan, gikulata, ingon man gitigbas sa suspek apan nakalingkawas siya ug nakadagan dayon nangayog panabang sa mga silingan.

Ang biktima nga nahibilin sa balay maoy gisunod sa pagtigbas.

Gibinaklid sa paggapos ang iyang duha ka mga kamot dayon gihiwa ang tiyan niini sama sa usa ka baboy nga gikuhaan sa sulod sa ginhawaan.

Ang mga silingan ug mga barangay tanod sa dapit kinsa ninglili sa balay nakakita sa suspek nga nagkaon sa atay sa biktima nga gisulod sa plato ug giasinan.

Apan way bisan usa kanila nga dunay kaisog sa pagdakop tungod kay pulos sila nangahadlok sa ilang nakita hinungdan nga usa ka konsehal sa barangay nipahibawo sa kapulisan.

Ang suspek dali kaayong nakasibat human niya gikaon ang atay sa bata.

Ilang naabtan ang lawas sa bata nga nagbuy-ob sa sawog, way sapot ug nahiwa ang tiyan.

Ang mga tinai nagpasad samtang ang atay diha sa lamesa nga gisulod sa plato nga giasinan diha pa.

Si SPO1Ramon Montecalbo, imbestigador sa Tabuelan Police nga nahinabi sa Sun.Star Superbalita, niingon nga nasusama sa usa ka baboy nga inihaw ang biktima.

Matod pa niya nga tulo ka plato ang gisudlan sa atay sa bata nga giasinan una gikaon.

Gani gamay na lang ang nahibilin sa atay dihang ilang naabtan.

Ang mga tinai diha sa sawog nga nagkatag apan ang kasingkasing sa bata diha pa sa lawas niini.

Gigamit sa suspek ang pinuti nga may gitas-on nga 14 inches apil na ang handle nga nahabilin ingon man ang pisi nga gigamit sa paggapos niini.

Apan iyang giklaro nga posibling patay na ang bata human maigo sa iyang ulo sa pagtigbas, unya gigapos dayon gihiwa ang tiyan niini human gihuboan sa iyang mga sapot.

Ang mga silingan sa lugar nibutyag nga ning mga nangaging adlaw kalit lang nausab ang suspek human wa na siya magtrabaho sa construction sa dakbayan sa Sugbo.

Nabantayan sa mga silingan nga di na kini hilumon sama kaniadto sanglit estoryador na kaayo ug mao pay manangit sa mga silingan

Si Pablita wa makatuo sa buhaton sa iyang anak sanglit nakurat na lang siya dihang nakamata nga gidapatan sa iyang anak.

Kon wa pa mabali ang sundang apil unta siya nga mamatay.

Niadtong Disyembre sa miaging tuig, usa ka Alfredo Taglocop Jr., nitigbas sa iyang magduha katuig nga anak nga lalake sa Brgy. Maravilla sa mao gihapong lungsod.

Related Stories

No stories found.
SunStar Publishing Inc.
www.sunstar.com.ph