Batman bus nabangga, 60 angol

MISAKA na ngadto sa 60 ka mga pasahero ang nangaangol human nibangga sa punoan sa kahoy ang pasaheroang Batman bus niadtong Domingo sa hapon sa Barangay Jampason lungsod sa Jasaan, Misamis Oriental.

Si Roger Macabinlar, 39, minyo, taga Esperanza, lungsod sa Kinoguitan, Misamis Oriental ug driver sa maong bus unang gidala sa Northern Mindanao Medical Center (NMMC) ning siyudad sa Cagayan de Oro human nabali ang tiil, napaso, ug anaa sa talandugon nga kahimtang.

Sa pasi-unang imbestigasyon sa Jasaan Police Station, nasuta nga gikan ang Batman bus sa bus stop sa lungsod sa Balingoan ug biyahe niini paingon sa siyudad.

Tungod lage kay barato ra kaayo ang pamasahe niini gawas pa nga daghan kaayo pasahero nga nanguli niadtong tungora, puno-puno gyud ang mga bus gani puno na ang sitting capacity niini bisan pa naa na sa Balingoan.

Apan gibutyag sa pipila ka mga pasahero nga bisan ug puno na sila kaayo daw magsige gihapon sa pangpick-up ug pasahero ang maong bus.

Pag-abot sa lungsod sa Jasaan ug tungod sa giingong kusog nga dagan niini, nabuthan kini ug ligid hinungdan sa pagbalitok niini ug mipaingon sa dako nga punoan sa Gemilina. Nabungkag ang makina ug nanglagpot ang init nga likido paingon sa mga pasahero nga nangaipit na niadtong tungora.

Giingong sagad sa natalsikan sa likido ang napaso sa kainit niini.

Deretsong gipangdala ang mokabat 60 ka mga pasahero apil na ang driver niini sa Jasaan Community Hospital apan tungod sa kadaghan ug aduna kritikal ang kahitmang nanawagan kini ug ambulansya ug dihang narespondehan gipangbalhin sa NMMC.

Ang pipila ka mga pasahero nga naangol sa insidente mao sila si Leo Santa, 24; Jonalyn Baranas, 22 ug anak nga si Lea Jen, 1; Mary Ann Cabalona, 20; Herla Andre, 20; Jeff Jerly Adajar, 49; Nika Lopez, 60; Jhonrel Nob, 6; Leo Baller, 12; Cheryl Adlawan, 15; Florecita Tumampos, 63; Tumampos Ariel, 11; Vina Balangiao, 20; Mirasol Cabantac, 41; Jeff Villarte, 11; Edna Tarde, 40; Janes Roselim, 13; Edito Sakwan, 30; Alfeo Odchigue, 64; Cosme Salusod, 54; Rosalino Salusod, 61; Carmen Odchigue, 56; Jonalita Odchigue; Joshua Mulawin, 23; Eddie Nagac; Mary Claire Tan, 11; Jayson Tabanio, 40; Lodelita Balaog, 63; Raul Cantada, 65; Felicitas Dalupere, 64; Rodulfo Jadelawan, 43; Reymund Tarud, 16; Reynalyn Lamban, 6; Joshua Tarde, 9; Rustom Veloz, 64; Loremer Orba, 43; Jodel Adlawon, 18; Pamilyang Lusdok nga mao sila si Rufo, 43; Marites, 42 ug mga anak nga sila si Mary Joy, 7; Mark Anthony, 5; ug Mary Jean, 1. Laing Tulo ang nadala sa Jr. Borja City hospital nga mao sila si Maricel Daguit; Jeffrrey Tirariray ug Nina Daguit. Aduna usab lima ka mga biktima nga anaa sa Polymedic General Hospital.

Si Police Officer 3 Gordon Gabia kinsa Traffic Investigator sa Jasaan Police Station nga nahinabi sa Sun.Star SuperBalita niingon nga reckless imprudence resulting to multiple physical injuries ang gikatakdang atubangon sa driver. Samtang ang tag-iya sa Batman Bus nga giilang si Francisco Hoy ang adunay civil liability.

Sa pagsulat ning balita daw wala pay pamahayag ang tag-iya sa bus. Migawas ang taho nga daw ang maong bus igo lang gipaabangan, hinuon padayon pa nga gisuta ning panahona.

Kahinumduman daan na nga gipasabot usab sa Land Transportation and Franchising Regulatory Board (LTFRB-10) nga gidili ang over capacity sa tanan bus aron luwas nga ilang mahatod ang pasahero. Gipasabot usab nga ang ligid dili basta mobuto kung dili kini overload ug nagsunod sa insakto nga kapasidad.

Tungod niini ang LTFRB mohimo ug masusing imbestigasyon kalabot sa hitabo aron maaksyunan ug dili na mahitabo ang susamang insidente sa bisan unsa man nga bus partikular sa Batman.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph