Bayot gipusil sa uyab

PADAYONG giobserbahan sa mga doktor sa Southern Philippines Medical Center ang kahimtang sa usa ka bayot nga napusilan human nakig-ilog sa armas sa iyang hinigugma nga lalaki didto sa Ecoland, syudad sa Davao.

Nahitabo ang insidente alas 5:00 sa hapon niadtong Sabado nga miresulta sa pagkasamad ni Renan Largo, 22, nagpuyo sa Sabroso Village, Barangay 76-A Bucana, ning siyuad.

Base sa imbestigasyon ni PO3 Harold Delima sa Talomo Police Station, ang suspek nailhan lamang sa alyas nga Alan, 22, ulitawo, nagpuyo sa Block 4, Talisay, Times Beach, Bucana.

Nasayran nga nagkalalis ang biktima ug suspek sa wala matinong hinungdan mao nga miibot ang suspek sa iyang dalang .45 kalibre nga pistola ug gition ngadto sa biktima.

Nagunitan sa biktima ang pusil mao nahitabo ang karambolan, apan nalupig siya sa kusog sa suspek hinungdan nga nailog ang pusil hangtud misangko sa pagpusil sa biktima.

Si Largo naigo sa iyang tiyan nga milapos sa iyang likod nga bahin sa lawas.

Daling misibat ang suspek sakay sa usa ka Honda XRM nga motorsiklo nga walay plate number padung sa Sabroso main road.

Daling gidala ang biktima sa ospital samtang gihikay na ang kaso sa kapulisan batok sa suspek aron patubagon sa kaso nga iyang nahimo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph