GIUYONAN na sa konseho ang ordinansahon nga mag-establisar og bike lanes sa mga karsada sa dakbayan sa Sugbo.
Si Mayor Michael Rama, kinsa uyon sa ordinansahon, niingon nga di angay dali-dalion ang pagpatuman sa bike lane kon di angay kining hatagan og dugang panahon alang sa pagtuon.
Atol sa regular session kagahapon, ang ordinansahon ni Konsehal Nida Cabrera wa makasugat og pagsupak gikan sa iyang mga kaubang magbabalaod, apan adunay mga concern nga angay atimanon.
Sa miaging semana, ang maong ordinansahon gikatakda na untang mapasar apan gumikan sa kabalaka sa ubang mga konsehal, naoktaba ang pag-aprobar atol sa final deliberation ug kagahapon hingpit nang nauyonan sa mga konsehal.
Si Rama, sa iyang bahin, nagkanayon nga gipatuman na sa lainlaing nasod gawas sa Pilipinas ang bike lane apan kinahanglan usab susihon ang posibleng epekto hilabi kon modagsa ang magbiseklita taliwa sa gagmay nga mga karsada sa dakbayan.
“If we don’t plan it very well, it can be an additional concern for traffic. But if it’s being planned very well, synchronized with data,” pasabot ni Rama.