Binghay: Manguros human sa kilat

NALUYA ko pagkadungog sa pahibalo nga nakapunting na sab pag-agi sa Visayas ang bagyo nga si “Hagupit” o Ruby. Ang kusog nga hangin ug uwan ni-ini gibanabana nga motadlas mismo sa gi-agian ni “Yolanda” 13 na ka buwan ang milabay human kini mi-angol ug mipatay og libu-an ug miguba sa binilyon nga mga tanaman ug edipisyo.

Kung ang kina-iyahan na gali ang manimalos, wala na kitay mahimo kon dili ang pagdawat sa dili kapugngan nga katalagman ug ang pagpangandam sa posibling grabe nga epekto sa kadaot nga ibilin niini human kini mokuso-kuso.

Maihap ra seguro nato ang mga nag-andam daan panahon nga dunay mangtas nga katalagman ang mo-abot ilabi na kung walay makita nga uwan o pagpanugdog. Kasagaran nato, unya ra manguros human sa kilat. Akong ipa-ambit ang mga makatabang mga tips panahon sa bagyo ug baha nga gipadala sa akong mga amigo nga si Eugene ug Valerie:

Kon signal no. 1 pa gali, kanunay maminaw ug motan-aw sa mga balita sa panahon gikan sa mga ligdong nga tinubdanan sama sa Pagasa nga makita sa telebisyon, madungog sa radyo ug mabasa sa online gamit ang internet.

Kon signal no. 2 na, angay likayan ang pagguwa sa balay ug pagpahigayon og mga kalihukan gawas sa panimalay.

Kon signal no. 3, mangita og dagko ug kusgan nga mga edipisyo aron didto luwas nga makasilong. Ginadili ang pag-adto daplin sa baybayon, suba o mga lugar nga ana- sa ubos.

Kon mosaka pa ang gikusgon niini, ayaw i-risgo ang kaugalingon sa pag biyahe ug mga kalihukan nga pagahimuon sa gawas. Mas luwas kung magtinir lang una sulod sa pinuy-anan.

Ayaw sipyata ang pag-andam sa Emergency Kit nga dunay sulod mga First Aid (mga tambal), tulo ka adlaw nga supply sa tubig, delata nga pagkaon, flashlight, extra nga kwarta, mga sinena, mga toiletress sama sa sabon, toothbrush, napkin ug uban pa, charger sa telepono ug ubang gadgets, sudlanan sa mga dokumento nga dili mabasa, Swiss knife, raincoat o payong, telepono nga dunay extra nga baterya lakip listahan sa mga telepono sa kapamilya nga dali rang makita.

Seguraduhon ang pagtan-aw sa gawas sa balay ug butangan og lig-on nga mga parte nga mahuyang. Hipuson ang mga importanting mga dokumento.

Sa layo pa, sabuton daan ang mga kabanay kung asa sila mahimong makabakwit. Kung mahilig ka og mga electronic gadgets gamit ang internet, mas makatabang kining mga sites: www.noah.dost.gov.ph, www.pagasa.dost.gov.ph o www.ndrrmc.gov.ph .

Way kumo nga mag-andam dili nga manguros human na ang kilat.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph