Bisan 1-bilyon ang pirma di ko mokandidato: Duterte

BISAN moabot pa og usa ka bilyon nga pirma sa katawhan, di gyud modagan si Mayor Rodrigo Duterte sa pagka-presidente sa Pilipinas.

Kini ang giluwatan nga pahayag sa mayor sa iyang programa sa telebisyon “Gikan sa Masa, Para sa Masa” kagahapon sa buntag.

Si Duterte nagkanayon nga di siya modagan tungod kay wa siyay mahimo isip presidente sa nasud sanglit anaa ang status quo sa gobyerno.

"Kung ma-presidente ko, swelduhan ko for 6 years, unya wala koy mahimo -- magsayang-sayang lang mog sweldo nako," tipik sa pahayag sa mayor kagahapon.

Namahayag niini ang mayor human gipangutana kung unsay iyang reaksyon sa padayong signature campaign aron padaganon ang mayor sa 2016 presidential election.

Si Duterte nagsulti sab nga kung siya ang ma-presidente, magrebelde siya sa iyang kaugalingon nga gobyerno, wagtangon niya ang Kongreso, ug mahimo nang semi-private ang gobyerno mao nga magmahay ang mga tawo nga namugos niya nga mokandidato.

Mikomento sab si Duterte sa column ni Ramon Tulfo sa nasyunal nga mantalaan nga ang mayor ray makapildi ni Vice President Jejomar Binay sanglit suportado ang mayor sa bagang duot sa mga Cebuano.

Giingon sa mayor nga di kadto tinuod sanglit hadlok siya sa bise presidente.

"Duterte is afraid of Binay," sulti sa mayor.

Niadtong miaging semana, ang grupo ni Kapitan Mar Masanguid nagpahibawo nga 4.5 milyon na nga pirma sa katawhan ang ilang nakuha sa pipila ka dapit nga nalibot sa “Pilipinas Duterte Movement 2016”.

Ang mga pirma gipakita ni Masanguid atol sa ilang gihimong Grand Rally alas 3:00 sa hapon niadtong Marso 29 didto sa Rizal Park, ning siyudad.

Nahukman kini nga himuon sa grupo ni Masanguid sanglit dako ang ilang pagtuo nga si Duterte ang mahimong tubag sa pagpakgang sa kurapsiyon sa nasud. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph