ANG buhatan sa Traffic Management Unit sa dakbayan sa Tagum hugot nga nagpatuman sa balaod labot sa bura-bora nga mga motorsiklo nga kusog ang tingog sa tambutso sa maong siyudad.
Niadtong Dominggo sa gabii, 23 ka mga single motor nga bura-bora ang tambutso nasakmit sa mga otoridad atol sa ilang gilusad nga operasyon.
Mga motorsiklo nga nasikop gi-impound dayon sa buhatan sa Tagum CPS ug giuli lamang sa mga tag-iya human nga matangtang ang mga tambutso ug ibalik ang orihinal.
Sumala pa ni Marcus Villanueva, hepe sa Tagum City Police Station, nga ilang gipahugtan ang pagpatuman sa balaod sa siyudad sa Tagum nga public disturbance human sa sumbong sa pipila ka mga molupyo sa kasaba hatud sa mga bura-bora nga tambutso sa mga single nga motor.
Hinuon sa unang pagsikop, gipasaylo pa sa mga otoridad ang mga malapason ug giuli kanila ang ilang mga motorsiklo ug ang tambutso lamang maoy gikuha.
Apan sa sunod nga masakpan pa sila, itugyan na ngadto sa buhatan sa Land Transportation Office ang mga masikop nga motor kung diin magmulta na og dako ang mga tag-iya sa paglukat niini.
Isip pagpakita sab nga hugot ang kampanya sa lokal nga kagamhanan sa nahisgutang balaod, si Mayor Rey Uy sa maong siyudad maoy nangunay sa pagdugmok sa mga nakompiska nga tambutso gamit ang pison.
Sumala ni Uy nga dili moundang ang mga otoridad sa pagpanakop sa mga malapason samtang nagpadayon pa sila sa paglapas sa balaod. (Marvin Pineda)