Cebu ug Manila magdinumbulay

KOMPIRMADO nga makigtigi ang mga banggiitang bilyarista gikan sa Cebu ug Manila sa 5th Sun.Star SuperBalita 1st National Open 9-Ball Challenge karong Nobyembre 10 hangtud 11 didto sa NCCC Mall Activity Area ning siyudad.

Kini ang pahayag ni Menlee Migellano, tournament director ug presidente sa Davao Billiard Association Inc. (DBAI), kagahapong adlawa.

"Daghan ang nanawag nako from Cebu ug Manila nga gusto moapil sa tournament," sumala ni Migellano.

Ang gamitong format sa duwa mao ang 9 ball international race to 7 alternate break elimination diin 12 ang kuhaon aron makasulod sa top 16 nga dunay upat ka seeded nga sila 2011 Champion Oscar Villasenor, Christopher Alanunay, Val Parajuay ug Gandy Valle.

Ang top 16 magkontra sa race to 7 knockout system aron maka-abante sa quartersfinal padulong sa kampeyonato samtang sa youth category tigian ang race to 4 eliminations.

Una niini, midonar si Gandy Valle og duha ka tako sa billiard alang sa mohari sa youth category; high school ug elementarya diin moduwa ang iyang anak sa unang higayon nga si Ralph Lauren Sapsal, 10 anyos, estudyante sa Holy Child College of Davao.

Ang torneyo opisyalan sa mga miyembro sa Davao Billiards Association Inc. (DBAI) kon diin tigian ang kategoryang open ug youth (joint elementary boys and girls, joint high school boys and girls, college men's and college women's).

Ang magkampeyon sa open mouli og P100,000 ug tropeyo samtang ang runner-up makadawat og P40,000.

Ang duha nga mapildi sa semi-finals mobulsa og P15,000 samtang ang upat nga matagak sa quarter-finals makadawat og P5,000 matag usa.

Ang ika-9 hangtud 16th makakuha sab og P1,500 matag usa.

Ang mohari sa Youth category makadawat og medalya, gift certificates ug freebies samtang ang mosunod sa tulo pa ka puwesto makadawat og freebies ug certificates.

Sa pagkakaron, padayon ang pagparehistro sa Sun.Star Davao office, Suites 5 and 6, Granland Bldg. R. Castillo Street sugod Lunes hangtud Biyernes, alas 8 sa buntag hangtud alas 5 sa hapon.

Ang deadline sa registration karong Nobyembre 8, ala 1 sa hapon hangtud alas 8 sa gabii sa NCCC Mall Activity Center.

Human niini, dunay himuon nga panagpulong sa mga partisipante, alas 8 sa gabii aron hisgutan ang mga balaod sa torneyo.

Ang Open entry fee nagkantidad og P850 ug 5 mastheads sa Superbalita samtang libre ang registration alang sa youth category.

Kinahanglan lang mopasa og 5 mastheads sa Sun.Star Davao ug ang certificate of enrollment gikan registrar, principal o school head.

Ang tulo ka adlaw nga kompetisyon gi-organisa sa Sun.Star Davao Publishing Inc., kauban ang Phoenix Petroleum Philippines Inc. nga gisuportahan sab sa Philippine Sports Commission, NCCC Mall Davao, Deca Homes sa 8990 Housing Development Corporation ug Sky Cable ug mga major sponsors sa torneyo nga gipaluyohan sab sa Microtel Inn and Suites Davao, Visuals in Motion Advertising, Boy Cherry Billiards Center, The Royal Mandaya Hotel, Hola Espa¤a, Laminine, Juego Sports, Davao Light and Power Company, Mindavote, city government of Davao, Dexter's Pizza, Vice Mayor Rodrigo R. Duterte, W.N Chemical ug Gino's Burger.

Alang sa dugang impormasyon tawag sa (082) 235-1007 o 235-1009.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph