NAGSUGOD nag pagpanawat og aplikasyon ang Cebu City Government pinaagi sa Department of Manpower Development and Placement (DMDP) alang sa mga out-of-school-youth ug mga tinun-an sa kolehiyo alang sa summer job sa City Hall.
Matod ni Suzzane Ardosa sa DMDP nga hangtod karong adlawng Biyernes ang ilang pagpanawat og aplikasyon gikan sa mga gustong motrabaho karong buwan sa Abril ug Mayo.
Gipasabot ni Ardosa nga kinahanglan nga adunay endorsement gikan sa mga piniling opisyal sa dakbayan sa Sugbo ang gustong mo-apply uban sa bio-data, certification sa barangay diin nagpuyo ang aplikante ug income tax return sa pamilya nga nagmatuod nga ang ilang kita di molapas sa P112,000 matag tuig ug isumiter sa iyang buhatan nga nahimutang sa 2nd floor sa Cogon Ramos Public Market.
Base sa ordinansa nga maoy nag-umol sa Special Program for the Employment of Students (SPES), naglatid nga 20 porsiyento magagikan sa buhatan sa mayor, laing 20 porsiyento sa Bise Mayor ug ang 60 porsiyento bahinon sa 17 ka mga konsehal.
Gipahibawo sa pangulo sa DMDP nga adunay 1,274 ka bakanteng trabaho ang mapahimuslan sa mga tinun-an sa kolehiyo ug gustong mo-eskwela nga taga siyudad nga nag-edad og 15 anyos hangtod 25 anyos, dugang ni Ardosa.
Ang makatrabaho sa gitanyag nga summer job sa City Hall makadawat og minimum nga suholan diin ang 60 porsiyento abagahon sa siyudad samtang ang 40 porsiyento gikan sa Department of Labor and Employment.
Sa pagkakaron, ang buhatan sa DMDP adunay kapin o kulang 500 ka mga aplikasyon ang nadawat human nihatag og abiso ngadto sa mga opisyal nga magsugod na silag panawat niadtong buwan sa Pebrero.
Ang mga aplikante mopaubos sa eksaminasyon sa DMDP nga ipahigayon matag adlaw sugod ugma hangtod sa Biyernes, pahibawo ni Ardosa.
Ang City Hall mopahigayon og summer job matag tuig aron pagtabang sa mga tinun-an nga makatrabaho aron adunay ikagasto sa ilang pag-eskwela. (PAC)