Coco oil spill nakontrol na

ILIGAN CITY -- Gikumpirma ni Lieutenant Commander Eliezer O. Dalnay sa Philippine Coast Guard sa Iligan nga nakontrolar na nila ang oil spill nga anaa karon sa mga kabaybayonan doul sa nasunog nga bodega sa kopras sa Granexport Manufacturing Corporation sa Barangay Kiwalan ning dakbayan sa Iligan.

Kini pinaagi sa pag-contain o pagbutang ug spill boom aron maka-ali sa mga mantika nga dili na makakuyanap sa ubang bahin sa Iligan ug mga kasikbit nga dapit.

Kagahapon, gikumpirma ni Dalnay nga gibana-bana nga moabot ngadto sa 250 metro kuwadrado ang gilapdon sa oil spill nga ilang na-contain ug moabot na ngadto sa 220 ka metros na ang ilang naariya nga babag o “oil containment boom.”

Kauban sa PCG sa pag-contain sa maong oil spill ang mga kawani sa Granex.

Samtang giklaro ni Engr. Ace Lagatiman, Safety Engineer sa Granex, nga dili tinood ang hungihong nga ilang gilabay na ngadto sa dagat ang ilang toxic chemicals nga gitawag ug solvent.

Matud pa ni Lagatiman nga anaa gihapon ang maong chemicals sa tangke nga mao gayuy butanganan niini ug luwas na kini sa kadaut o kabalaka nga mobusikad tungod sa dakung kalayo nga milamoy sa bodega sa kopras nga anaa lamang usab sa duol.

Sa kasamtangan, padayon ang Granex sa ilang gihimong clearing operations aron pagkuha sa mga nasunog nga kopras, apan dili matud pa kini madali tungod kay padayon paman nga nagdilaab ang dakung kalayo.

Hinoon hinay-hinay lamang ang ilang paghaw-as sa maong mga sunog nga kopras tungod na usab sa mga mahulog nga fire debris nga delikado alang sa mga bombero ug sa operator sa backhoe. (Divina M. Suson)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph