Comelec mibahad sa mga kandidato

MIBAHAD ang Commission on Election (Comelec) sa Cagayan de Oro City ngadto sa mga magpapili sa umaabot nga barangay election nga mosubay sa ilang balaod.

Kini ang gibutyag ni City Comelec officer Lawyer Aleli Ramirez kinsa midugang nga aduna na siyay nadawat nga mga report nga nagsugod na og pangampanya maski wala pa gani natapos ang filing sa certificate of candidacy (COC).

Gipahibalo niini nga usa lamang ka semana ang gihatag sa Comelec nga mangampanya ang mga kandidato ug kini sa petsa 18 ngadto sa 26 lamang sa Oktubre.

Kung mapamatud-an ang usa ka kandidato nga nakasupak sa mga gabayan sa Comelec mapahamtangan gyod kini og silot partikular ang diswalipikasyon sa iyang kandidatura.

Sa pagsulat ning balita atol sa ikaduhang adlaw sa filing sa COC, mokabat na sa 50 ang ni-file og COC sa magpapili og pagka-barangay kapitan gikan sa nagkalain-laing barangay samtang 130 ang nagfile isip pagka-konsehal sa nagkalain-laing dapit.

Niadtong Sabado, pahulay usa ang filing nga mobalik karong adlawa. (SVB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph