Compio: Agik-ik

WA KO magdahom nga makita ang ilang mga lihok ug ekspresyon paunsa malingaw ang mga namati diha sa kahanginan sa ilang pagpagitik sa mga istoryang makapaagik-ik sa mga tigpaminaw.

Kung mahiligon ka sa pagpaminaw og radyo, ma-FM man o AM band, dayag nga anaa nimo ang kahinam, tungod gusto nimo silang makit-an sa personal, gusto nimo silang malamano ug gusto nimo silang mahimong higala nga bisan naglakaw ka sa dalan mag-ilhanay mo.

Bisan og naa na ko sa natad sa pagbalita, bisan og daghan na ko'g mga higala nga naa sa radyo, wa gihapon nako gibuhian ang kahigayonan nga madugangan ang akong mga higala nga anaa sa radyo nagtrabaho.

Subay niini, walay kabutangan sa akong kalipay, kagahapon sa buntag human ko miduaw sa sibyahanan sa dxGO Aksyon Radyo Davao diin nahimamat nako sila Aksyon Pepe dela Cruz Bucao, Aksyon Jhun Ociones Suter ug Aksyon Alger Dura -- pipila sa mga inila ug banggiitang magsisibya sa radyo sa dakbayan sa Davao.

Di na god sila bag-o nako tungod kay kaila naman nako sila, ilabi na si Sir Alger Dura kay siya man among managing editor ning mantalaan, nagkahimamatay na sab kami ni Aksyon Jhun sa daghang higayon, apan si Idol Pepz, ikaduhang higayon pa kadto kagahapon.

Gusto ko silang makita atol nga mag-programa sila kay sila ang hinungdan nga nasud-ipan ug nahilos ko sa init nga kape human ko mibahakhak sa ilang pakatawa, usa ka buntag.

Daw nagdamgo lang ko sa akong pagsulod sa announcers' booth, tungod di ko makatuo nga ambungan kaayo ang tulo, ang gitawag 'Tatlong Itlog' sa ilang mga suking tigpaminaw, buyag!

Bisan kamo, gusto sab mo nga makita ang mga personalidad luyo sa ilang mga tingog, sama sab nako, garbo sa kaugalingon nga nakita nako sila.

Niadto pa, mahiligon na gyud ko maminaw og mga tulumanon sa radyo, ilabi na sa mga drama, maong nangindahay sab ko nga makita unta ang mga dramatorgo nga taga Cebu.

Nahinumdom hinuon ko sa akong higala nga nagpasalamat kang DJ Monica sa 88.3 Energy FM-Davao kay nagbalik ug nagpakasal sila pinaagi sa programang "Dear Monica" niadtong tuig 2006.

Nakaingon ko nga di man sab diay sayon ang papel sa usa ka announcer sa radyo tungod, gawas sa paghatag og impormasyon ug opinyon, puwede sab diay silang mamahimong tulay aron malimtan ang mga kaguol ug gumunhap sa mga nagkadaiyang kaagi sa kinabuhi pinaagi sa ilang pagpakatawa ug pagpanambag diha sa kahanginan.

Sa programang "Balita Bayan, Numero Uno" makahilos mo'g kape kada buntag, padayon sa pagpaagik-ik, kanamo!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph