PAREHONG giawhag sa Department of Interior and Local Government (DILG) ang kampo nila ni Daan Bantayan Mayor Sun Shimura ug Engr. Augusto Corro nga magpabiling kalmado aron malikayan ang kagubot.
Kini ang panawagan ni DILG-7 director Pedro Noval taliwa sa giingong pag-serve na sa writ of execution gikan sa korte sa Bogo City nga una nang napugngan human niluwat og injunction ug temporary restraining order ang Commission on Elecions (Comelec).
Apan matod ni Noval nga wa pa silay nadawat nga kopya sa desisyon maong si Shimura ug Vice Mayor Ma. Luisa Loot gihapon ang ilang giilang mayor ug bise mayor.
Nagpadala na hinuon og tawo si Noval sa lungsod aron maoy motan-aw sa kahimtang ug masiguro nga masubay ang proseso ug di mapasagdan ang trabaho ilabina na ang paghatag og basic services gumikan lang sa tensiyon.
Giangkon ni Noval nga taas ang proseso sanglit duna may kahigayonan ang mga Loot nga moduso og motion for reconsideration maong gihangyo niya ang kampo ni Corro nga di lang magdalidali aron di moulbo ang kagubot.
“Atong hangyo sa duha ka mga kampo nga likayan ang kagubot. Ilang pahimangnoan ang ilang mga supporters aron likayan nga moinit ang ilang mga supporters kay mas init ra ba gyud ni sila nuon,” nagkanayon si Noval.
Gipasalig hinuon sa kampo ni Corro nga di sila mangita og gubot ug mosubay sila sa proseso.
Apan alang kang Corro tataw na ang desisyon sa Comelec First Division maong hangyo niya sa mga Loot nga tumanon usab kini.
“Kung kinsa man kaninyo mobuhat og di maayo ako ang inyong mahimong kontra,” pahimangno ni Corro ngadto sa iyang mga supporters atol sa gihimo nilang prayer rally niadtong Sabado.
Matod ni Corro nga mahimong makasang-at og mosyon ang mga Loot apan di kini makapugong sa pag-take over na nila ni Dr. Jose de Leon.
Apan si Shimura niingon nga ang writ of execution gikan sa korte di maoy makapanaog kanila kon di kinahanglang maggikan ang kamandoan sa Comelec en banc.
Gani siya niingon nga ang hukom ra gyud sa Korte Suprema ang makonsiderar nga final and executor maong di gyud sila mobiya sa ilang puwesto.
Matod ni Shimura nga way mahitabong kagubot kon di mamugos ang kampo ni Corro sa pag-take over sa municipal hall.(CPL)