Daneco giatake, 7 sikop

USA ka security guard ang naangol dihang giatake sa pito ka mga tawo ang sub-station office sa Davao del Norte Electric Cooperative (Daneco) didto sa Barangay Villarica, Babak District, Island Garden City of Samal kagahapon sa kaadlawon.

Ang biktima mao si Julius Ibcas, 37, minyo, sakop sa OPSCOR Security Agency, nagpuyo sa Libertad, Kaputian, Island Garden City of Samal.

Si Police Inspector Eba Nicolas, commander sa Babak Police Sub-station, nagbutyag sa Sun.Star Davao SuperBalita nga ang biktima naigo sa iyang walang bukton.

Si Ibcas gitambalan dayon sa Babak District Hospital, apan suma sa opisyal, luwas na siya makuyaw nga kahimtang.

"Naka-return fire ang victim mao to nga mi-escape ang mga suspects," sulti ni Nicolas.

Siya nagkanayon nga dihang miresponde sila sa maong dapit, dunay nakatudlo sa dapit diin miagi ang mga suspek nga miresulta sa pagkasikop ni Roland Villa Abrille, hamtong, nagpuyo sa Balit, Babak.

"Naay mi narekober nga duha ka motorcycle. Ang usa naay sulod nga .38 caliber revolver," sulti ni Nicolas.

Dugang niya nga samtang nagpadayon ang ilang hot pursuit operation, ilang nasikop ang lain pang unom ka mga tawo.

"Nadakpan namo ang ilang leader-leader, pero di nako memorized ang ilang mga pangalan kay dia pa ko sa field," sulti ni Nicolas.

Ang motibo sa maong hitabo, suma sa opisyal, mao ang padayong bangi sa Daneco ilawom sa National Electrification Administration (NEA) ug Cooperative Development Authority (CDA) factions.

"Gusto yud sa CDA faction nga mo-take over sa Daneco Sub-station Office mao nga ilang gisulong kaganiha," pahayag ni Nicolas.

Si Engr. Dan Gervacio, board of director sa Daneco, nagpahibalo sa Sun.Star SuperBalita nga ang nadakpan mao sila Bonifacio Manlaonan, Alfredo Cano, Gil Florenosos, taga Tagum City; Jovert Lolo, Ricky Penas ug Jeoffry Francisquete, pulos nagpuyo sa Maco, Compostela Valley province.

"Si Florenosos mao ang ilang leader sa pag-attack base sa statements sa mga tawo nga nakakita nila," sulti ni Gervacio.

Siya nagsulti nga kaila kaayo niya ang suspek tungod kay siya pa ang nag-assign niini sa Daneco Samal Sub-station isip area chief niadtong tuig 2009.

"Pag-referendum, mipahawa siya sa among grupo kay mibalhin sa CDA faction, mao nga siya ang nag-lead sa pag-take over," sulti Gervacio.

Samtang gisuwat king balita, padayong gihikay ang kasong attempted murder batok sa mga suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph