Defense lawyer miluwat

NILUWAT na sa iyang katungdana si Atty. Inocencio dela Cerna isip abogado sa duha ka mga kanhi miyembro sa Highway Patrol Group 7 nga gilambigit sa kamatayon ni Atty. Noel Archival ug duha ka mga kaubanan.

Hinuon adunay duha ka mga Manila-based lawyers nga gipuli kaniya.

Niduso sa iyang motion to withdraw as counsel si Atty. Dela Cerna ngadto sa Provincial Prosecutors Office alang nilang kanhi HPG 7 chief, Sr. Supt. Romualdo Iglesia ug PO1 Alex Bacani.

Sa pagka-karon, pabilin pa hinuon siyang abogado ni Sr. Insp. Joselito Lerion.

Silang Iglesia, Lerion ug Bacani maoy girekomendar ni Fiscal Jesus Tagaan nga pasakaan gyud ug mga kasong multiple ug frustrated murder ngadto sa korte. Kini human makita nga dunay igong kapasikaran ang alegasyon nga nalambigit sila sa pagbanhig-patay kang Atty. Archival niadtong Pebrero sa Corro, Dalaguete.

Matod ni Atty. Dela Cerna, mas gipili nilang Iglesia ug Bacani nga mokuha ug laing mga abogado hulip kaniya human nga dismayado sila nga naduhig gyud ang ilang pangalan sa maong kaso. Ang mga Manila-based lawyers nga mao nay mohupot sa kaso nilang Iglesia ug Bacani mao sila si Atty. Reynaldo Lugtu ug Atty. Joselito Frial.

Ang mga HPG personnel nga una nang gi-abswelto sa kaso nga silang Chief Insp. Eduardo Mara ug SPO4 Edwin Galan pabilin hinuon nga mga kliyente ni Atty. Dela Cerna.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph