GIPAHINUMDOMAN ni Cebu Archbishop Jose Palma ang katawhan nga ang Semana Santa panahon sa pamalandong sa mga pag-antos, kasakit ug kamatayon sa Ginuo ug dili panahon sa bakasyon.
“Kining panahona dili panahon sa bakasyon pero panahon nga gihatag nato aron makapamalandong kita sa mga gibuhat sa atong Ginuong Hesukristo,” nagkanayon ang arsobispo sa iyang mensahe alang sa Lent atol sa gipatawag nga press conference kagahapon.
Naobserbahan sa simbahan nga ang ubang mga Katoliko mamakasyon panahon sa Semana Santa, maglulinghayaw ug maglingawlingaw sa mga beach resort ug nakalimtan ang tinuoray nga kahulogan sa balaang mga adlaw.
Si Palma niawhag sa mga tawo nga himuon ang Semana Santa nga panahon sa pagpanginlabot sa mga buluhaton sa simbahan.
Siya nidasig sa tanan nga mag-ampo, moduaw sa mga relihiyusong lugar, maghinulsol sa mga sala ug mobalik sa Dios pinaagi sa pagpangumpisal ug pagdawat sa mga sakramento.
“Aron sa atong pagbasol sa atong mga sala ug sa atong pagdawat sa mga sakramento, mahimo kining panahon sa grasya, panahon sa pagbag-o, panahon sa pagdawat sa gugma sa Dios. Aron si Hesus nga diha sa krus, mag-welcome natong tanan...” pagpasabot ni Palma.
Samtang, ang arsobispo nipahinumdom usab sa mga magtutuo nga ang nga pagpalansang sa krus sama sa gibuhat ni Gilbert Bargayo sa daghang katuigan hugot nga gi-discourage sa simbahang Katoliko.
“As a general rule, gi-discourage man gyud sa simbahan kining very literal nga interpretation nato sa pagsunod sa mga kasakit sa atong Ginuo,” dugang sa arsobispo.
