Direktor sa Housing board gipusil

MITUGPA sa balay tambalanan ang usa ka abogado human siya gipusil didto sa dalang Mabini kanto Torres, syudad sa Davao niadtong Dominggo.

Ang biktima mao si Atty. Roberto Mauro Miguel Palma Gil, 38, ulitawo, Regional Director sa Housing and Land Use Regulatoy Board (HLURB) ug nagpuyo sa Town House 85, Palm Street, Green Heights Subdivision, Barangay Buhangin Proper, ning siyudad.

Si Palma Gil naigo sa iyang walang bukton dihang gipusil ni Alan Bigcas, hamtong, nagpuyo sa Cagayan de Oro City.

Si Bigcas nalambigit sa miaging tuig sa 'car smuggling' human gironda sa mga otoridad ang mga mahalong sakyanan nga iyang gitagoan sa warehouse didto sa Cagayan de Oro City ug Bukidnon.

Base sa imbestigasyon ni SPO1 Sherwin Arbania sa San Pedro Poilice Station, nasayran nga ang biktima sakay sa usa ka itom nga Toyota Vios nga dunay plate number TRI-135 apan gisundan siya ni Bigcas nga sakay sa kolor Gray nga pick-up ug kauban si Atty. Aimee Salisi Torrefranca.

Pag-abot atubangan sa Tiny Kitchen nga establisemento sa dalang Torres, mihunong ang biktima dayon gipangutana si Bigcas nganong gisundan siya.

Mikanaog si Bigcas sa sakyanan nga nagbitbit sa iyang .45 kalibre nga pistola mao nga nahitabo ang pagpamusil.

Suma sa mga nakasaksi sa hitabo, nakadagan si Palma Gil padulong sa iyang sakyanan diin niya gikuha ang iyang armas nga Glock Caliber 40.

Naigo si Palma Gil sa walang bukton dayon misibat si Bigcas sakay sa iyang sakyanan ug gibiyaan si Torrefranca.

Daling gidala ni Torrefranca si Palma Gil sa Brokenshire Hospital.

Nakuha sa kapulisan sa crime scene ang duha ka mga basiyo sa kalibre .45 nga pistola, usa ka basiyo ug usa ka buhing bala sa caliber .40 nga pistola.

Didto sa tambalanan, gitunol ni Palma Gil ang yawe sa iyang sakyanan ngadto sa kapulisan aron kuhaon ang iyang armas uban sa 37 ka mga buhing bala nga anaa karon sa kustodiya sa San Pedro Police Station.

Gipangita na sa kapulisan ang suspek kinsa gipasakaan og kasong Frustrated Murder sa City Prosecutors Office kagahapong adlawa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph