Diriyot na sab

LAING masakit, sikit, ug kulbahinam nga kapildihan ang nasinati sa Gilas Pilipinas batok world no.3 Argentina, 85-81, niadtong Lunes sa gabii sa 2014 FIBA World Cup of Basketball sa Seville, Spain.

Ang Gilas ningbangon gikan sa 10 ka puntos nga pagkalubong sa 4th quarter ug napahak nila ang labaw sa Argentina ngadto sa usa na lang ka puntos sa hinapos nga bahin.

Gipangulohan ni Ranidel de Ocampo pinaagi sa iyang 18 puntos, nidugang og 15 puntos – siyam niini sa 4th quarter, nitampo og 14 puntos si naturalized Andray Blatche samtang nihatag og 10 puntos si Jayson Castro.

Gikan sa 61-71 nga biya, ang Gilas ni coach Chot Reyes ningmugna og 8-0 nga rally aron isikit og balik ang duwa, 69-71.

Ningbawos sab pagpasutoy sa ilang opensa ang Argentina aron inaton og balik ang ilang bintaha ngadto sa 77-69 sa nahabiling pito ka mga minutos.

Nagkumboya sila si Blatche, Alapag, ug Gabe Norwood sa katapusang hunat sa Gilas aron mas isikit pa ang kombati, 81-82, sa hinapos nga bahin apan sa ikaduhang higayon sulod sa tulo ka mga duwa, wala nakompleto sa mga Pinoy ang ilang pagbangon.

Sa premirong duwa sa Gilas, hapit sab silang modaog apan nalupig ra gihapon sila sa Croatia pinaagi sa overtime, 78-81.

Batok sa Argentina, napamatud-an sa Gilas nga dili taphaw ang ilang puwersa ug angayan gyud silang makasulod sa world stage.

Nikawat og dakong atensyon mao ang duha ka mga hansak ni Gilas forward Gabe Norwood sa duwa diin ang usa atubangan ni Luis Scola, kinsa sakop sa Indiana Pacers sa National Basketball Association (NBA).

Ang Argentina segurado nang makaabante sa round-of-16 knockout stage bitbit ang 2-1 nga rekord samtang ang Gilas natagak sa 0-3 nga baraha. Nagkinahanglang modaog ang Gilas sa katapusan nilang duha ka mga tahas batok sa Puerto Rico ug Senegal aron makaabante sa sunod round.

Karong alas 7:30 sa gabii, ang Gilas makigbatok sa Puerto Rico.

Ang Puerto Rico pangulohan nila ni NBA player JJ Barea sa Minnesota Timberwolves ug kanhi NBA player Renaldo Balkman, kinsa kanhi import sa Petron Blaze Boosters sa Philippine Basketball Association (PBA).

Si Balkman mituok sa iya ra sab kauban sa Petron nga si Arwind Santos hinungdan nga gi-ban siya sa PBA.

Sama sa Gilas, ang Puerto Rico wala pa sa’y daog sulod sa tulo ka mga duwa.

Puntos matag usa

Argentina (85) – Scola 19, Mata 17, Laprovittola 10, Herrmann 10, Nocioni 9, Campazzo 9, Prigioni 8, Gutierrez 3

Gilas Pilipinas (81) – De Ocampo 18, Alapag 15, Blatche 14, Castro 11, Norwood 6, Fajardo 6, Lee 6, Tenorio 3, Aguilar 2, Pingris 0, Chan 0. Quarterscores: 22-25, 43-38, 71-61, 85-81.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph